“You’ll Never Walk Alone”: Lana Del Rey ја отпеа химната на Ливерпул
Пејачката Lana Del Rey објави „a capella“ верзија на легендарната песна “You’ll Never Walk Alone”, која ќе се најде во новиот документарец, кој се фокусира на богатата историја и фановите на фудбалскиот клуб Ливерпул.
Оваа песна првично се појави во мјузиклот „Carousel“, на познатиот авторски тандем Rodgers и Hammerstein, но верзијата на групата Gerry & The Pacemakers од 1963 година стана долгогодишна химна на актуелниот шампион на англиската Премиер лига и една од најпопуларните навивачки песни во светот.
Lana ја сподели својата верзија на Инстаграм, со црно-бело видео на кое се гледа како ја изведува оваа класика.
“You’ll Never Walk Alone – a cappella. За новиот документарец за Ливерпул”, напиша пејачката во краткиот коментар. Повеќе информации за овој филм ќе добиеме во наредните денови, пренесува порталот Headliner.
Новиот потфат доаѓа откако Lana се врати на сцената со новиот сингл „Let Me Love You Like A Woman“, прва песна објавена од нејзиниот претстоен албум „Chemtrails Over The Country Club“.
Објавувањето на албумот беше одложено, а новиот термин е јануари 2021 година. Новото издание го следи успешниот албум „Norman Fucking Rockwell“ од 2019 година.
