Утврдени неправилности во управувањето со имотот,инвестициите и човечките ресурси во АД МЕПСО- Скопје
Државниот завод за ревизија (ДЗР) изврши ревизија на финансиските извештаи и усогласеноста на работењето на АД МЕПСО за 2024 година, при што беа утврдени повеќе слабости поврзани со евиденцијата на имотот, реализацијата на инвестициите и користењето на кредитните средства.
Ревизорите посочуваат дека дел од електропреносната инфраструктура и земјиштето сè уште немаат целосно регулиран правен статус, а за дел од имотот недостасува соодветна сметководствена евиденција. Од вкупно 112 далекуводи, за 59 МЕПСО не располага со имотни листови, додека за 33 трафостаници во заедничка сопственост со ЕВН Македонија сè уште не се решени сите сопственички прашања.
Во извештајот се наведува и дека постојната сметководствена евиденција не овозможува прецизно утврдување на бројот и вредноста на дел од далекуводите и трафостаниците. Дополнително, утврдени се неправилности во евидентирањето на материјалните средства и инвестициите, што влијаело врз пресметката на амортизацијата и финансискиот резултат на друштвото.
ДЗР забележува дека во изминатите години МЕПСО реализирал значајни инвестиции за модернизација на електропреносната мрежа, но дел од проектите се соочиле со доцнења, зголемени трошоци и пролонгирани рокови. Кај одредени проекти вредноста на договорите била значително зголемена, а има и случаи на раскинати договори по делумна реализација.
Ревизорите посочуваат дека МЕПСО располага со кредитни линии во вредност од над 102 милиони евра, но повеќе од половина од средствата не се повлечени. Поради тоа, само во 2024 година биле платени над 245 илјади евра за провизии за неповлечени средства, додека вкупните трошоци за камати и провизии за заемите достигнале речиси девет милиони евра.
Извештајот укажува и на значително зголемување на побарувањата по дадени заеми на други државни компании, што, според ревизорите, може негативно да влијае врз ликвидноста на друштвото. Дел од побарувањата се постари од три години, а нивната наплата останува неизвесна.
Кај 65 проценти од нововработените лица во 2024 година биле утврдени неправилности поврзани со исполнувањето на условите од јавните огласи и систематизацијата на работните места.
Во извештајот е нотирано и дека МЕПСО во текот на 2024 година бил цел на сајбер напад кој привремено предизвикал недостапност на дел од ИТ системите и податоците, без притоа да биде загрозен преносот на електрична енергија. Настанот, според ревизорите, ја нагласува потребата од дополнително зајакнување на сајбер безбедноста.
И покрај утврдените слабости, ревизијата покажува дека приходите од основната дејност – пренос на електрична енергија – бележат раст, како и приходите од прекуграничните преносни капацитети, додека загубите во мрежата имаат тренд на намалување.
