Netflix „падна“ за време на премиерата на петтата сезона од „Stranger Things“

Популарната стриминг-платформа „Нетфликс“ накратко доживеа пад, веднаш по објавувањето на првите четири епизоди од финалната, петта сезона на култната серија (Stranger Things), пренесува „Пипл“.

Премиерата стартуваше во 17 часот по тихоокеанско време, но дел од гледачите беа непријатно изненадени кога платформата одеднаш престана да функционира токму во моментот кога се обидоа да зачекорат во мистериозниот свет на „The Upside Down“.

Од „Нетфликс“ за „Пипл“ изјавиле дека „мал дел корисници имале краткотрајна потешкотија со емитување преку телевизиски уреди, но сервисот беше стабилизиран за помалку од пет минути“.

Интересен е и податокот дека само неколку часа пред премиерата, Рос Дафер — еден од браќата кои стојат зад серијата — на Инстаграм открил дека платформата го засилила интернет-опсегот за 30 проценти за да избегне ваков проблем. Но, очигледно, енормниот интерес сепак го надминал очекуваното.

Првиот тизер-трејлер за финалната сезона беше објавен уште во 2024 година, откривајќи дека приказната ќе се одвива во есента 1987 година — само една година по настаните од четвртата сезона, која беше сместена во пролетта 1986. Според најавите, последната сезона ќе ги спои сите главни ликови во решавачкиот судир со мрачниот свет „The Upside Down“.

Меѓу актерите што се враќаат во финалето се Мили Боби Браун, Дејвид Харбур, Фин Волфхард, Гејтен Матарацо, Калеб Меклафлин, Ноа Шнап, Сејди Синк, Наталија Даер, Чарли Хитон, Џо Кири, Винона Рајдер и други.

Браќата Дафер претходно открија дека петтата сезона ќе биде пократка од претходната, која траеше околу 13 часа.

„Овој пат одиме многу побрзо. Нема долго воведување — влегуваме директно во акција“, изјави Мет Дафер за „Врап“.

Официјално е потврдено дека сезоната ќе има вкупно осум епизоди. Рос Дафер неодамна ги објави и должините на првите четири:

• Епизода 1: 1 час и 8 минути

• Епизода 2: 54 минути

• Епизода 3: 1 час и 6 минути

• Епизода 4: 1 час и 23 минути

Следните три епизоди пристигнуваат на 25 декември, додека големото финале, последната епизода на серијата, ќе биде објавено на 31 декември.