Реновирана Клиниката за урологија – нови хируршки методи и свеж кадар, во тек е реновирањето на Центарот за трансплантација

Клиниката за урологија денес официјално го претстави својот нов изглед по целосната реконструкција, со која установата доби современа инфраструктура, нова медицинска опрема и две напредни хируршки методи кои досега не се применувале кај нас.

Министерот за здравство Азир Алиу, заедно со премиерот Христијан Мицкоски, ја посетија клиниката по повод завршените работи. Алиу истакна дека оваа реконструкција е дел од пошироката стратегија за модернизација на македонското здравство.

„Продолжуваме со уште една клиника. Инфраструктурно, тука сè е според европските стандарди. Технологијата и методологијата се во склад со потребите на пациентите и со европските протоколи. Чекор по чекор, здравството станува европско и поблиску до секој граѓанин,“ рече министерот.

Покрај новата опрема, во клиниката се вработени и 20 стручни лица кои ќе обезбедат подобра услуга и поквалитетна грижа за пациентите.

Во моментов е во тек реновирање на Центарот за трансплантација, кој исто така ќе добие модерни услови за работа и третман на пациентите. Според министерот, во наредниот период јавноста ќе биде запознаена и со други инфраструктурни проекти во здравството.