ЗАПОЧНУВА ТРЕТАТА СЕЗОНА ОД РЕГИОНАЛНАТА ЕМИСИЈА ЗА КНИЖЕВНОСТ INSIDE/OUT
Третата сезона од регионалната онлајн емисија за книжевност Inside/Out, започнува во петок, 21 мај, со почеток од 20 часот. Темат во фокус на оваа сезона се современите македонски феминистички и квир книжевност, култура и практики. Сезоната ја реализираат Коалиција МАРГИНИ, порталот за култура ОКНО и мрежата Побуњених читатељки (Pobunjenih čitateljki) од Србија.
Емисијата има за цел да го разјасни креативниот процес и ја промовира книжевноста како работа која е девалвирана во нашето општество, а заслужува рамноправен третман помеѓу професиите. Inside/Out се стреми кон поврзување и јакнење на постјугословенската книжевна сцена и надминување на јазичните, културните и генерациските бариери. Активно учество во емисијата ќе земат книжевнички/ци, културологињи/зи, критичар(к)и, преведувач(к)и и активист(к)и од целиот регион, со посебно внимание кон претставување и интеграција на младите од овие полиња на културата.
Третата сезона е посветена на работата македонската сцена која се занимава со феминистички и квир промислувања. Сезоната ќе се емитува во текот на месеците јуни и октомври 2021 година, на Јутјуб и Фејсбук каналите на партнерските организации. Линк до Фејсбук настанот:
Во петочната, прва епизода, насловена „Однатре креативниот процес“ ќе гостува македонската писателка Румена Бужаровска, а разговорот ќе го модерира Марија Божиќ. Тие ќе го дисецираат процесот на пишување и преведување преку анализа на различните преводни верзии на расказите од збирката „Не одам никаде“ од Бужаровска.
Освен тоа, тие ќе се осврнат и на навигацијата на читателските потреби во овие кризни времиња, проблемот на занемарување на уредничката работа како суштински дел од книжевниот процес, претставувањето на овдешните писателки на странските пазари, итн.
Редакцијата на третата сезона на Inside/Out ја сочинуваат: Мања Величковска, Борисав Матиќ, Фросина Крушкаровска и Наџа Бобичиќ.
Линк до Фејсбук-настанот од првата епизода: https://bit.ly/3bAPUkK
