Вакцинираните не пренесуваат инфекција

Германскиот епидемиолошки институт „Роберт Кох“ објави дека луѓето вакцинирани против коронавирусот немаат никаков ризик од пренесување на инфекцијата, по што германскиот министер за здравство Јенс Шпан најави ублажување на мерките за вакцинираните.

„Кој е целосно вакциниран, мора да се третира како и луѓето со негативен тест на корона“, изјави Шпан во интервју за „Bild“.

Тој се осврна на извештајот на државниот епидемиолошки институт „Роберт Кох“, од кој произлегува дека можноста за пренесување на коронавирус е помала кај лицата кои биле целосно вакцинирани отколку кај лицата кои биле негативни на ковид, пренесе Хина.

Според најновите откритија, ризикот од пренесување на коронавирус кај лица кои биле вакцинирани, не подоцна од 15 дена по приемот на втората доза на вакцината, е помал отколку кај луѓето со негативен тест за коронавирус, стои во извештајот на Институтот Роберт Кох.

Според нив, луѓето кои примиле втора доза на вакцина треба да бидат изземени од задолжителни тестови и карантин.

Германскиот министер за здравство изјави дека извештајот на Институтот бил испратен вчера до федералните провинции со цел што побрзо да се ослободат лицата кои биле вакцинирани од обврската за тестирање и самоизолација.

Вакцинираните лица на тој начин би можеле да имаат пристап до услуги како фризер или влегување во продавници или музеи за каде што е потребен негативен тест.

„Во следните недели, во разговори со покраинските власти, треба да ги спроведеме новите мерки“, изјави Шпан.