Познати се сите групи на Европското првенство
Со синоќешните натпревари од финалето на дополнителните квалификации се комплетирани сите групи за Европското првенство, што следното лето треба да се одржи во 12 европски градови.
Македонија влезе во историјата со победата над Грузија со 1-0 во Тбилиси, и за прв пат во својата историја се пласираше на ЕП. Унгарија го победи Исланд со 2:1 со луд пресврт, а со истиот резултат Словачка славеше во Северна Ирска по продолженијата. Во најдраматичниот натпревар, Шкотска ја победи Србија на пенали со 5:4 во Белград. По 120 минути беше 1:1.
Извлекувањето на групите се одржа на 30 ноември минатата година кога однапред беа утврдени позициите на секоја од четирите репрезентации кои доаѓаат од дополнителните квалификации. Да потсетиме, дополнителните квалификации беа врзани за Лигата на нации, така што имавме четири „final four-a“ во секоја од четирите лиги.
По завршувањето на дополнителните квалификации, групите на Европското првенство изгледаат вака:
ГРУПА А: Италија, Турција, Велс, Швајцарија
ГРУПА Б: Данска, Финска, Белгија, Русија
ГРУПА Ц: Холандија, Украина, Австрија, Македонија
ГРУПА Д: Англија, Хрватска, Чешка, Шкотска
ГРУПА Е: Шпанија, Шведска, Полска, Словачка
ГРУПА Ф: Португалија, Германија, Франција, Унгарија
УЕФА ја разгледува опцијата Европското првенство следната година да се одржи само во една земја, а не во 12 градови како што првично беше замислено. Доколку нема нови одложувања или промени поради пандемијата на коронавирусoт, ЕП треба да започне на 11 јуни во Рим со натпревар меѓу Турција и Италија.
