Италијански вирусолог: „Мораме да ја запреме хистеријата, Ковид-19 има ниска стапка на смртност“

Италијанскиот вирусолог Џорџо Палу изјави дека коронавирусот е опасен, за некои и  смртоносен, но дека, генерално, смртноста е мала, и секако не е на ниво на чума.
„Мора да престанеме со оваа хистерија“, изјави Палу во интервју за дневниот весник „Кориере дела сера“.

Тој предупреди дека новиот карантин на целата територија на Италија ќе биде „самоубиство за економијата, казна за студентите и учениците и ќе значи дискриминација на оние кои страдаат од други болести, пред се од карцином, бидејќи за нив нема да има место во болниците“.

Палу, професор на Универзитетот во Падова и поранешен претседател на Европската асоцијација на вирусолози, изјави дека „состојбата во оделенијата за интензивна нега е веродостоен индикатор за Ковид-19, бидејќи само тие податоци даваат реална слика за инфекцијата“.

Неговиот став за епидемиолошката состојба е во јасна спротивност со апелите кои овие денови до владата ги испратија научниците и јавните работници, но и со наодите на две институции кои се сметаат за врховен орган за здравството, Министерството за здравство и Високиот институт за здравство.