3 работи клучни за среќна врска
Хелен Фишер, почитуван антрополог, која со години го истражува мозокот, вели дека забележала три активации во мозокот кај партнери во долги и среќни бракови – во центрите одговорни за емпатија, контрола на емоции и т.н. позитивни илузии.
Така, таа дошла до заклучок дека овие три работи се многу важни за среќна врска:
- Емпатија
Способноста на паровите да чувствуваат сочувство едни кон други е многу важна точка за долг и среќен брак. Ако едниот партнер може да разбере како се чувствува другиот и низ што поминува, проблемите и несогласувањата се решаваат брзо и лесно.
Емпатичните луѓе можат лесно да се поврзат со некого и вистински да го разберат и се одлични партнери.
- Контрола на емоции
Многу е важно да можете да ги контролирате емоциите за време на стресни ситуации. Ова е исклучително важно за успехот на врската, вели Хелен Фишер. На пример, паровите кои постојано се расправаат pоради финансии, имаат поголема шанса да се разделат од оние кои тоа не го прават.
– Една од теориите е дека кога ќе го додадете стресот поради финансии, во веќе кревката врска, партнерите ќе раскинат мислејќи дека ќе можат подобро сами да се справат со финансиските тешкотии – изјави Фишер.
Таа додаде дека заедничката работа на проблемите со ладна глава може да помогне да се спаси врската и со текот на времето таа да стане посилна. Важно е партнерите да си даваат простор едни на други да се изразуваат, да се разбираат и почитуваат едни со други.
- Позитивни илузии
„Користењето позитивни илузии во една врска може да биде клучот за нејзино зајакнување и долговечност“, вели Фишер.
Ова значи дека врската треба да се фокусира на она што е позитивно, а не негативно. Имено, има убави и помалку убави работи во секоја врска, сега е само прашање на кое ќе го насочите вниманието.
Ако ги гледате добрите, и вие и вашиот партнер ќе се чувствувате подобро, а позитивната енергија ќе извира од вас и обратно.
– Позитивните илузии помагаат во обликување на навиките, рутината, па дури и на личноста. Фокусирајте се на она што е добро кај вашиот партнер, наместо на работите врз кои немате контрола и не можете да ги менувате. На крајот на краиштата, никој не е совршен – додаде Фишер.
