Во Америка нема повеќе мајмуни за тестирање на вакцината за Ковид-19

Глобалната трка за вакцина против коронавирусот која треба да стави крај на пандемијата предизвика недостиг на мајмуни.

Како што јавуваат американските медиуми, пред да се тестираат потенцијални вакцини врз луѓето, во предклиничките истражувања се испитува безбедноста и ефективноста на вакцините на мајмуните. Но, со оглед на тоа што во игра моментално се повеќе од 100 можни вакцини, побарувачката за мајмуни ја надмина понудата.

„Имаме недостиг“, изјави за „USA Today“, докторот Скип Бом кој е помошник директор задолжен за ветеринарна медицина во Националниот центар за истражување на примати во Њу Орлеанс.

„USA Today“ наведува дека, како и во многу други аспекти на општеството, пандемијата го изнесе веќе постоечкиот проблем во преден план.

Истражувачките центри на приматите со години се соочуваат со проблеми поради ограничувањата на увозот на мајмуни од земји како Кина и Индија, но и поради недостатокот на финансирање за одгледување мајмуни во САД.

„Отсекогаш сме биле во состојба во која нашето општество едвај ја задоволуваше побарувачката за мајмуни кои се користат во истражувања, а кога букна пандемијата на коронавирусот, тоа нè турна уште подалеку“, посочи Бом.

Иако организациите за права на животните се спротиставуваат на употребата на примати во научни експерименти, истражувачите велат дека ваквите практики се клучни за развојот на медицината.

Центарот во Њу Орлеанс на својата веб-страница наведува дека се обидуваат да користат најмал можен број на животни потребни за валидни научни резултати. За жал, во моментов не е можно целосно да се замени употребата на животни со компјутерски модели.

Извор:index.hr