Доминик Тим направи историја со епски пресврт во финалето на Ју-Ес Опен

Доминик Тим конечно ја дочека својата прва грен слем титула во кариерата, откако во претходните три пати остана на едно скалило од самиот врв, бидејќи губеше во финалињата на Ролан Гарос и Австралија Опен.

 

Рано утрово во Њујорк, австрискиот тенисер испиша тениска историја, бидејќи начинот на кој стигна до големиот успех беше навистина неверојатен и веднаш го стави во историските читанки на грен-слемот во Њујорк.

 

Тим делуваше загубено во првите 90 минути игра, имаше негатива од 2:0 во сетови и заостануваше со еден брејк во третиот, но некако успеа да се консолидира и на крајот се избори за епски пресврт на Ју-Ес Опен. Откако ги загуби првите два сета со 6:2 и 6:4, популарниот Доми возврати во наредните два со 6:4 и 6:3, а тоа што се случи во одлучувачкиот сет е тешко за објаснување.

 

Тим тргна подобро и веднаш направи брејк, Зверев кој прокоцка позитива од два сета возврати и го диктираше темпото до 5:3, но кога дојде да сервира за прва грен слем титула во кариерата, младиот Германец потклекна. Тим го врати брејкот и израмни на 5:5, а потоа со нов брејк поведе со 6:5 и доби шанса на свој сервис да го заврши неизвесното финале.

 

Сепак, Зверев не се предаде и му го одзема сервисот на противникот, па така мечот отиде во тајбрејк завршница. Во него, Австриецот најпрво не искористи две топки за титула, но затоа ја искористи третата и со конечни 8:6 во завршната игра стигна до својата прва грен слем титула во кариерата.

 

Доминик на овој начин стана првиот тенисер во Опен ерата кој се вратил во едно финале на Ју-Ес Опен по негатива од два сета, па секако неговата прва титула на големите турнири остава и значаен печат во историјата на тенисот.

 

Извор: derbi.mk