Фетел на чекор до нов тим

Серџио Перез објави дека на крајот од сезоната го напушта Рејсинг Поинт, а Би-Би-Си објави дека Себастијан Фетел би можел да го наследи во тимот.

Доаѓањето на четирикратниот шампион во Формула 1 во Рејсинг Поинт сè уште не е потврдено, но познато е дека му е понуден договор. Претходно, Перез ја отфрли можноста да си замине и имаше договор до 2022 година, но на крајот го раскина договорот со Рејсинг Поинт, каде мина седум години.

“Сè во животот има почеток и крај. Ова ме боли затоа што бев во тимот во многу тешки моменти, но исто така сум горд на сите заеднички моменти и пријателства што ги имав тука”, изјави 30-годишниот Перез.

Рејсинг Поинт е поранешна Форс Индија и оваа сезона, во моментов се наоѓа на 4 место во генералниот пласман во Формула 1 зад Мерцедес, Ред Бул и Мекларен.

Синот на сопственикот Ленс Строл останува во тимот на Рејсинг Поинт, а за следната сезона треба да му се придружи Фетел, кој го загуби местото во Ферари затоа што таму ќе возат Чарлс Леклер и Карлос Саинц.

С.С.