ШИЛЕГОВ: ГИ ПОТТИКНУВАМЕ МЛАДИТЕ СТРУЧНО ДА СЕ ОБРАЗУВААТ ЗА ДА БИДАТ КОНКУРЕНТНИ НА ПАЗАРОТ НА ТРУДОТ

Во рамки на втората фаза од кампањата за промоција на средното стручно образование „Учи паметно, работи стручно“ чија цел е идните средношколци да се запознаат со перспективите и можностите што ги нуди овој тип образование,  градоначалникот Петре Шилегов и министерката за образование и наука, Мила Царовска,  денеска го посетија средното училиште на Град Скопје „Владо Тасевски“.

 

• Задоволство ми е што сум овде во најдоброто, најдигитализираното и најопременото средно училиште во Македонија „Владо Тасевски“ кое веќе 60 години е дел од образовниот процес во нашава држава, во рамки на отворените денови на училиштето. Нашата цел е да ја промовираме дуалната настава. Во учебната 2021/2022 година во 11 средни училишта во нашиот град ќе се отворат 25 паралелки кои под мотото „Учи паметно, работи стручно“ им овозможуваат на средношколците во самиот образовен процес да добијат доволно стручна надградба. Станува збор за производство на кадри на пазарот на трудот коишто се сериозно дефицитарни. Уште од самиот почеток, тие што ќе се определат за дуална настава стануваат стипендисти на компаниите кои се соработници на Министерството за образование и наука и на Градот Скопје и преку стипендијата, односно остручувањето на учениците им се гарантира и вработување веднаш по завршувањето на средното образование. На овој начин сакаме да ги поттикнеме младите во Скопје стручно да се образуваат за да бидат конкурентни на пазарот на трудот и на добро платени работни места – рече денеска градоначалникот Шилегов.

Тој ги покани претставниците на медиумите да го разгледаат училиштето „Владо Тасевски“ и да посведочат како во изминатите три години Градот Скопје успеа целосно да го реновира и да обезбеди најдобри и најдигитализирани училници во државата со што се пресретнува мултимедијалниот начин на одвивање на наставата, односно дигитализацијата на наставата. 

 

• Скопје е современ, европски град. Тие се стандардите за коишто јас се залагам, тие се стандардите што моите соработници ги имплементираат. Во ова училиште има две училишни компании, го стимулираме и претприемништвото. Ве поканувам да станете корисници на услугите на тие компании кои се непрофитабилни, но пораките кои ги испраќаат се еколошки, дигитализирани и имаат голема поддршка и од училиштето и од Градот Скопје. Ве повикувам да промовираме нешто што е во зародиш во образовниот процес во  нашава држава, да помогнеме сите овие прекрасни деца кои волонтерски ја работат оваа работа да бидат промовирани во јавноста со цел тој процес да го придвижиме и во преостанатите училишта во Македонија – рече Шилегов. 

 

Според министерката Царовска, за во едно училиште да има добра работна атмосфера значајно е да има спремни наставници, добри програми и квалитетна инфраструктура и опременост на училиштето, а во ова училиште сите три елементи се задоволени.

 

• Мојата главна порака до учениците од деветто одделение кои сега бараат каде да се запишат е да ги изберат струките кои ги нуди ова училиште, зашто училиштето не не остручува само за работата што треба да ја извршуваме, туку не гради и како личности кои треба да бидат продуктивни и да ја развиваат и движат економијата во нашава држава – нагласи Царовска.

Во средното училиште „Владо Тасевски“ денеска беа поставени штандови на кои ученици и наставници компетентни во струката ги промовираа образовните струки и профили кои се нудат како можност за запишување на учениците во прва година средно стручно образование. Целта на отворените денови е да се подигне јавната свест за предностите на средното стручно образование, промовирање на струките и образовните профили кои ги нуди ова училишта, менување на перцепцијата за стручното образование, промоција на можностите за стипендии, како и на  можностите за пракса и вработување по завршување на средното образование.