„Не знаеме како Вудс остана жив”

Тајгер Вудс се опоравува од повредите здобиени во тешката сообраќајна несреќа, кои според полицијата можеле да бидат фатални. 

 

Вудс изгубил контрола над својот џип и слетал од патот, а автомобилот бил толку оштетен што пожарникарите морале да го исечат лимот за да го извлечат. 

 

Во болницата му биле дијагностицирани тешки фрактури на двете нозе (две отворени од десната страна), поради што веднаш бил опериран. 

 

Полициските службеници најавија дека истрагата ќе трае неколку недели, но се сомневаат дека причината за несреќата е неприлагодена брзина, додека нема индиции дека Вудс бил под дејство на недозволени супстанции. 

 

“Несреќата се случи на стрмен дел од патот, со многу кривини, каде луѓето честопати губат контрола над возилото поради прекумерна брзина. Веруваме дека брзината e главната причина за несреќата. Немаше индиции дека возачот бил под влијание на некакви супстанци. Утврдивме дека возилото најверојатно удрило прво во работ на патот, преминало две ленти, удрило во друг раб, дрво, се превртело неколку пати и застанало на стотина јарди од патот. Немаше знаци на лизгање или кочење, а времето беше добро. Искрено, не знаеме како г-дин Вудс преживеа, но, имал многу среќа. Сигурно му помогнал појасот со кој беше врзан и бројните воздушни перничиња што се отвориле”, изјави Алехандро Вилануева од канцеларијата на шерифот во Лос Анџелес. 

 

По несреќата на Вудс се случил уште една. 

 

Автомобил кој застанал да му помогне на голферот бил удрен од друг автомобил, но за среќа никој не е повреден. 

 

Вудс претежно живее во Флорида, каде во декември имаше операција на грбот. 

 

Вудс дошол во Лос Анџелес на турнир поддржан од неговата фондација, каде што ги учи славните да играат голф. 

 

Несреќата се случила на патот кон теренот, каде што требало да има снимање.