Ван Дајк на теренот пред очекуваниот датум

Добра вест за Јирген Клоп и сите во тимот на англискиот шампион, Ливерпул. 

Еден од најдобрите стопери на светот, Вирџил ван Дајк, кој е на рехабилитација во Дубаи, би можел да се врати на теренот пред предвидениот рок и да му помогне на клубот во одбраната на титулата. 

Холанѓанецот се здоби со повреда на вкрстените лигаменти во октомври и од тој дерби натпревар со Евертон нема играно, а многумина веруваа дека сезоната за него е завршена.

Сепак, најновите информации кажуваат дека Ван Дајк би можел да се врати на терените во април, што значи дека тој би можел да биде тука за оние последни борби во сезоната која треба да заврши до крајот на мај. 

Тоа секако е голем плус за „црвените“ кои во моментов имаат многу проблеми со повредите. 

Наспроти тоа, лошата вест е дека вториот стопер на тимот, Џо Гомез, може да го пропушти остатокот од сезоната поради повреда на коленото. 

Бидејќи Џоел Матип е повторно повреден, Ливерпул има проблем да ја состави последната линија, па во пресметката со Вест Хем, стоперски пар најверојатно ќе бидат играчи од клупската академија, Натаниел Филипс или Рис Вилијамс, заедно со капитенот Џордан Хендерсон, кој е принуден да игра на тоа место. 

Натпреварот на стадионот во Лондон започнува во 17.30 часот.