Хоакин Феникс е новиот Наполеон Бонапарта

Оскаровецот Хоакин Феникс доби чест да портретира една од најпознатите историски личности, францускиот воен лидер Наполеон Први Бонапарта во филмот Kitbag во режија на Ридли Скот. 

Apple Studios ќе го финансира и продуцира филмот, кој започнува да се снима на почетокот на следната година во Велика Британија. 

Хоакин Феникс минатата година доби Оскар за најдобра машка улога благодарение на улогата во филмот Џокер (2019).

Оваа филмска реализација нема да биде прва соработка помеѓу Феникс и Скот. Имено, овој актер го играше римскиот император Комодус во хитот Гладијатор на Скот во 2000 година. 

“Ниту еден актер не може да го игра Наполеон, толку добро како Хоакин. Нему веќе му појде од рака да оживее еден римски император како никој пред него, затоа верувам дека ќе го повтори истиот подвиг во овој филм”, изјави Скот за изборот на Феникс за улогата на Наполеон.

Скот додаде дека решил да режира филм за Наполеон затоа што отсекогаш бил фасциниран од него. 

“Тој се појави од никаде и ја презеде апсолутната моќ во Франција. Во време кога се бореше во Европа и освојуваше нови територии, тој водеше и вистинска мала љубовна војна со неговата сопруга Жозефин, која редовно го изневеруваше со други мажи”, истакна Скот, пишува Deadline.