TikTok воведува ограничувања за најмладите корисници
Децата на TikTok ќе се соочат со нови, „револуционерни“ ограничувања, соопшти компанијата, најавувајќи строги правила за деца под 16 години.
Од TikTok најавуваат дека корисниците на возраст под 16 години повеќе нема да можат да добиваат коментари од непознати, дека нивните видеа повеќе нема да можат да се користат за дуети или да ги обележуваат своите објави како достапни за преземање. Нивните профили ќе бидат приватни, што ќе спречи било кој, освен нивните пријатели, да ги гледаат нивните видеа.
Компанијата исто така ги менува стандардните поставки во апликацијата за корисници на возраст под 18 години. Ако тие самите не ги променат поставките, нивните видеа исто така ќе бидат недостапни за преземање, а само пријателите ќе можат да снимаат дуети.
„Денешните револуционерни промени претставуваат следен чекор во нашата мисија да осигуриме дека TikTok е безбедна платформа за сите наши корисници“, изјави Александра Еванс, европска директорка на Службата за безбедност на децата на TikTok, потсетувајќи на претходните измени што ги направија, вклучително и ограничување на директните пораки и хостирање преноси во живо за корисници на возраст под 16 години и овозможување на родителите да постават заштити на профилот на своите деца преку функцијата Family Pairing.
Измените ќе влијаат на десетици милиони најмлади корисници на TikTok, како на постојните, така и на новорегистрираните профили. Тие ќе бидат известени за промените, за кои од компанијата велат дека „имаат за цел да постигнат повисоки стандарди за приватност и безбедност на корисникот“. Иако новите поставки не ги решаваат сите проблеми, се очекува помалку деца да комуницираат со луѓе што не ги познаваат.
