Можна промена на планот за почеток на сезоната во Ф1

Новата сезона во Формула 1 најверојатно нема да започне како што беше планирано со трката за Големата награда на Австралија

Властите во таа земја ја разгледуваат можноста за одложување поради пандемијата на коронавирусот. 

Новата сезона треба да започне на 21 март со трка во Мелбурн, а како што објави Скај, трката најверојатно ќе биде одложена за подоцна, поради строгите правила за карантин во Мелбурн. 

Властите на Викторија изјавија дека се разговара за организацијата на трката.

Според распоредот за оваа сезона, втората трка е во Бахреин на 28 март, и тогаш би можело да започне сезоната. 

Мелбурн во февруари се подготвува да го организира првиот голем спортски настан после скоро една година, кога ќе се игра Австралија опен. За сите учесници задолжителен е двонеделен карантин, поради што турнирот беше преместен од јануари во февруари.

Задолжителен карантин исто така би бил случај и во Формула 1, а во тие околности не би било можно да се организира трката. Сите учесници ќе треба да пристигнат во Мелбурн три недели пред трката, што би го загрозило предсезонското тестирање што е закажано за периодот од 2 до 4 март. 

Минатата сезона започна во јули и имаше 17 трки. Возачот на Мерцедес, Луис Хамилтон ја освои седмата шампионска титула, додека неговиот тим стана шампион во конкуренција на конструктори седми пат по ред.