Откриено зошто се караа Мурињо и Клоп: „Мислев дека Жозе се шегува“

Тотенхем загуби од Ливерпул со 2-1 во судирот на двата водечки тимови во Премиер лигата и тоа со гол во 90-та минута. После натпреварот, Мурињо и менаџерот на Ливерпул, Јирген Клоп имаа жестока расправија, а во интервју на Amazon Prime Sport, едно од првите прашања за Мурињо беше во врска со тој конфликт. “Му реков дека изгуби подобриот тим. Тој ми рече дека не се согласува со мене, тоа е негово мислење. Нема проблеми меѓу нас двајца”, изјави Мурињо.

Клоп: Мислев дека се шегува 

Клоп изгледаше збунето кога новинарите на BBC го прашаа за расправијата со Мурињо.

“Мене воопшто не ми изгледаше толку напнато. Мурињо не беше среќен. Ми рече дека подобриот тим изгубил, а јас мислев дека се шегува. Тој не се шегувал и тоа е тоа”. 

На социјалните мрежи, повеќето љубители на фудбалот застанаа на страната на Клоп. Тие ја споделуваат статистиката на натпреварот која покажува дека Ливерпул имал 11 удари кон противничкиот гол, девет повеќе од своите противници и дури 76 проценти посед на топката. Фановите на Мурињо и Тотенхем велат дека лондонскиот клуб имал подобри шанси и ја погодија стативата на 1: 1.