Во Индија се појави непозната болест: Повеќе од 100 лица се хоспитализирани

Официјални лица во Индија ја испитуваат причината за неидентификувана болест поради која повеќе од 140 лица се хоспитализирани за време на викендот. 

Пациентите, од Елуру во Андра Прадеш, имале широк спектар на симптоми од гадење до напади и несвестица, велат лекарите, пренесува Би-Би-Си, наведувајќи дека голем дел од хоспитализираните се опоравиле и се пуштени на домашно лекување.

Локалните медиуми велат дека пациентите направиле тестови за коронавирус и сите биле негативни. 

Медицински службеник во Државната болница Елуру за Индијан експрес изјави: “Луѓето кои се разболеа, особено децата, одеднаш почнаа да повраќаат откако се пожалија дека ги печат очите. Некои од нив се онесвестија или претрпеа напади”, изјави медицински службеник во болницата во Елуру. 

Министерот за здравство на Андра Прадеш, Ала Кали Кришна Сринивас, изјави дека примероците од крвта на пациентите не покажуваат знаци на вирусна инфекција. 

„Го отфрливме загадувањето на водата и воздухот откако стручни тимови ги посетија областите каде луѓето се разболуваа“, изјави Сринивас. Според него, тоа е мистериозна болест, а лабораториската анализа само ќе покаже за што станува збор.