Концерт на СИМОН ТРПЧЕСКИ И ПРИЈАТЕЛИТЕ 43-ти ДЕНОВИ НА МАКЕДОНСКА МУЗИКА

43. Денови на македонската музика во соработка со КултурОп, со особена чест, гордост и задоволство го најавува концертот на претставникот и носителот на македонскиот идентитет низ светот:

Маестро Симон Трпчески и пријателите
 

Светски познатиот македонски пијанист, човекот кој ги освојува срцата на публиката со својата виртуозност, топлина и извонредна музикалност, по подолго време е повторно пред македонската публика, заедно со неговите пријатели, врвни македонски уметници: Влатко Нушев, Илинка Велкова, Александар Стојчески, Владимир Крстев, Паскал Краповски, Гонца Богоромова, Иван Наумовски, Милена Арсовска и Шкељзен Бафтијари.

Фотографија: B. Ealovega / S.Spirovski – KulturOp
 

На програмата на ова вистинско доживување, експлозија од убавина, бројни светски и македонски премиери, се дела од Гоце Коларовски, Борјан Цанев, Димитрије Бужаровски, Панде Шахов, Александра Наумоски- Потиск, Томислав Зографски, Томе Манчев, Стојан Стојков, Фатос Лумани, Дарија Андовска и Александар Лековски.
 

Билетите по цена од 500 денари се достапни преку продажната мрежа на mktickets.mk.
Организацијата ги запазува сите мерки и протоколи за заштита од КОВИД-19.
 

„Уметноста на Трпчески е да истражува длабоко под нотите и да ги извлекува неопходниот карактер и суштината на партитурата. […] Умешноста и страста создадоа перформанс што беше вонредно привлечен со својата свежина и со неговиот капацитет да го разоткрие срцето на музиката.”
Телеграф

Симон Трпчески настапува со оркестри како Кралскиот Концертгебау оркестар, Националниот оркестар на Русија, ВДР Синфониеоркестер, Националниот оркестар на Франција, Њујоршката филхармонија, Кинескиот филхармониски оркестар и Симфониски оркестар на Сиднеј. Тој редовно изведува солистички рецитали во културните престолнини како Њујорк, Париз, Минхен, Прага, Сао Паоло, Сиднеј, Пекинг, Токио и Лондон каде неодамна беше Резидентен Уметник во салата Вигмор. Настапува на престижни фестивали меѓу кои Вербие, Берген, Фестивал Балтичко Море, Мекленбург Западна Померанија, Робеко, Аспен, Кабрило, Равинија, Блосом и БиБиСи Промс.
 
Во текот на сезоната 2020/2021, Трпчески ќе се врати како солист со Националниот оркестар на Франција, Филхармонија оркестар, Руски национален оркестар, Филхармонија на Монте Карло, Симфониски оркестар на градот Бирмингем, Тонхале – Оркестер Цирих, Минесота и Санкт Петербург филхармонија како и Симфониските оркестри на Балтимор и Чикаго. Тој ќе ја заврши сезоната настапувајќи со Кралскиот филхармониски оркестар на Ливерпул на последниот концерт на Василиј Петренко како музички директор. Како посветен камерен музичар се појавува со рецитали во Амстердам Концертгебау, во Сингапур, во Јужна Америка и на Лондонските меѓународни пијано серии. Тој исто така го продолжува партнерството во дует со виолончелистот Даниел Милер-Шот.
 
Трпчески е особено страстен кон неговиот етно-проект „МАКЕДОНИСИМО“, осмислен со композиторот Панде Шахов, кој ги слави музиката и културата на неговата родна Македонија. По серијата успешни концерти во Вигмор Хол, Концертгебау, Лудвигсбург Фестшпиле, Лил Фестивал, Радио концертна сала Катовице и Јужнокорејската турнеја, квинтетот продолжува да одржува концерти на меѓународен план со предвидени настапи во Москва, Виена, Отава, Австралија и Азија во сезоната 2021/22.
 
Најновото аудио издание на Трпчески реализиран во 2019 година – компакт диск со соло руски репертоар со назив „Сказни од Русија“ со ONYX, доби едногласни критички признанија. Во 2020 година тој започна соработка со LINN Records, а првиот реализиран компакт диск е „МАКЕДОНИСИМО“, кој доби одлични критики од меѓународниот печат, меѓу кои: „Избор на Уредникот од Престо Класикал“ – „Слушањето на овој радосен, налудничав албум од македонскиот пијанист и пријателите се чувствува како прислушување на бучна ноќна џем-сесија… тоа е нешто што потврдува живот; Двојни 5 ѕвезди на BBC Music Magazine – „неверојатно пријатно слушање… имагинативно, сложено и со прекрасна топлина… радосен диск. „Култна Снимка“ од Рондо Магазин, „Резултатот го одзема здивот“ од „Концерти“, како и критиката на „Грамофон“ – честопати деликатно како камерната музика на Моцарт“. Во тековната сезона тој ќе ги сними концертите за клавир на Шостакович, за LINN. Неговата деби-снимка (ЕМИ, 2002) ги доби „Избор на уредникот“ и „Деби албум“ на Грамофон Наградите. Во 2010 и 2011 година, неговите интерпретации на целосните концерти на Рахмањинов беа препознаени со признанијата од Класик ФМ, Грамофон „Избор на Уредникот“ и Diapason d’Or. Неговата снимка за Onyx Classics на концертите за пијано на Прокофјев бр. 1 и 3 повторно го освои Diapason d’Or во септември 2017 година.
 
Трпчески е целосно посветен на воспитно-образовните активности. Бил професор на Факултетот за музичка уметност во Скопје. Неговата пријатна и пријателска личност продолжува да ги инспирира помладите генерации ширум светот, одржувајќи мастер класови во градови како Лондон, Манчестер, Бирмингем, Берлин, Љубљана, Шангај, Хонг Конг, Окланд, Велингтон, Осло, Ставангер, Даблин, Варшава, Далас, Сан Франциско, Солт Лејк Сити, Загреб и Белград.

Со специјална поддршка на КултурОп – македонска културно-уметничка организација, Трпчески редовно работи со млади музичари во Македонија негувајќи ја следната генерација уметници во земјата. Роден во Македонија, Трпчески учел кај Борис Романов. Претходно беше уметник на БиБиСи од новата генерација и беше почестен со Наградата за млади уметници на Кралската филхармонија во 2003 година.