ДЕНЕС Е СВЕТСКИ ДЕН НА ДЕТЕТО

Светски ден на детето или меѓународен ден на детето е годишен меѓународен настан што се слави на 20 ноември.

Основано е од Генералното собрание на Обединетите нации во 1954 година со цел да се слави на ист ден во сите земји.

Светскиот ден на детето ја промовира меѓусебна интеракција и разбирање меѓу децата и благосостојба на децата во светот. Овој ден се одбележува и со цел да се сврти вниманието на јавноста кон обврските на општеството кон децата, како и кон актуелните проблеми со кои се соочуваат децата.

Правата на децата се утврдени со Конвенцијата за правата на детето, која е ратификувана од 193 земји, а основните принципи се правото на живот, опстанок и развој, најдобрите интереси на детето, правото на учество и правото на недискриминација.

Целта е спречување на насилство врз децата и дискриминација, обезбедување еднакви услови за живот, здравствена заштита, социјална заштита, достапно квалитетно образование, дополнителна поддршка, игра и дружење – тие се задача на секој од нас, а не само на родителите и вработените во институциите.