Вакцината „Модерна“ – 94,5 проценти

Фармацевтската компанија Модерна денес објави дека ефикасноста на нејзината експериментална вакцина против коронавирусот е 94,5 проценти, а информациите се базираат на последната фаза од клиничкото тестирање.

Ова е втора американска компанија која за само седум дена ја издаде вакцината со голема ефикасност против Ковид-19. Пред Модерна, тоа го стори Фајзер, чија што ефикасност е нешто повеќе од 90 проценти, објави Ројтерс.

Освен ефикасноста, кај вакцината на Модерна, се издвојува уште една битна работа – таа не бара чување на екстремно ниски температури, туку е стабилна на температури од два до осум степени 30 дена и може шест месеци да се чува на температура од минус 20.

Вакцината на Фајзер мора да се чува на минус 70, додека руската Спутник V, која е ефикасна 92 проценти, може да се чува на минус 18.

Модерна дојде до овие резултати врз основа на тестирање на 30.000 волонтери, и чека американското регулаторно тело за здравство да дозволи употреба на нивната вакцина.

Фармацевтските компании „Фајзер“ од САД и германски „Бионтек“ пред неколку дена објавија дека нивната експериментална вакцина има ефикасност поголема од 90 проценти во спречување на Ковид-19, врз основа на првичните податоци од големата студија, што претставува голема победа во борбата против пандемијата.