Германија во борбата против коронавирусот додаде нов метод, за кој експертите се залагаат со месеци.

Станува збор за редовнo проветрување на просториите, што е своевидна опсесија на Германците кои, како и обично, ги проветруваат своите станови и куќи двапати на ден, дури и во зима. Во договорите за закуп на станбени простории има клаузула за тоа, како обврска на оние што изнајмуваат одредени простории, а со цел да се заштитат од мувла и лош мирис, пишува „Гардијан“.

Иако некои луѓе може да го отфрлат овој метод како примитивен во смисла дека е премногу едноставен, тој всушност „може да биде еден од најевтините и најефикасните начини“ за борба против вирусот, изјави неодамна во Берлин германската канцеларка Ангела Меркел.

Меркел изјави дека насоките на Владата за борба против Ковид-19 ќе бидат преименувани од кратенката АHА, што значи физичко растојание, хигиена и носење маски, во AHACL – C ја означува владината апликација за предупредување од корона вирусот и L проветрувањето.

„Редовната силна вентилација (проветрување) на сите приватни и јавни простории може значително да го намали ризикот од инфекција“, се вели во препораката на владата.

За какво проветрување станува збор? Експертите за хигиена на воздухот во Германија велат дека под „Stosslüften“ се подразбира пет минути отворање прозорци наутро и навечер.

Уште поефикасно е вкрстеното проветрување, „Querlüften“, што значи отворање на сите прозорци во станот или куќа за да излезе застоениот, а да влезе свеж воздух.

Во Германија, повеќето прозорци се направени со помош на современа технологија што овозможува отворање на прозорците, а со тоа и проветрување од различни агли.