Со фестивал се заокружува одбележувањето на големиот јубилеј – 30 години Канал 103
30 ГОДИНИ КАНАЛ 103
слоганите се на заслужен одмор
Официјално илегално, квалитетно проветрено и полно со ентузијазам, музичкото
радио Канал 103 ја најавува својата целовечерна роденденска прослава.
Петок, 1 октомври, Плато МКЦ. Почеток: 18 часот.
Во духот на програмската ориентација на радиото кое ја поддржува и промовира
храбрата и независна музичка сцена, богатото фестивалското мени содржи
жанровски разновидна понуда со строго контролирано органско потекло.
Настапуваат: LELEE (Словенија), Shock Troopers, Перија, Светлост, Тодор
Караколев, Lufthansa и Blaž (Словенија).
Фестивалот ќе започне со промоција на „Момент документ“, фото-монографија на
Зденко Петровски во издание на МКЦ, проследено со придружна изложба на негови
фотографии.
Билетите во строго ограничен број се достапни на билетарницата на МКЦ и на
следниот линк >> https://kanal103.us19.list-man
По интимниот концерт на Крсте Роџевски во Куршумли Ан и редовните „103 средби
низ музика“ во клубот Ла Кања, со овој фестивал се заокружува одбележувањето на
големиот јубилеј – 30 години Канал 103. Борбата продолжува.
Настанот ќе се реализира согласно актуелните протоколи за организирање настани
на отворено.
Поддржано од Министерството за култура и МКЦ.
Детален опис на програмата:
LELEE е словенечко разиграно инди/пост-панк трио, совршен пример на
мултикултурно поврзување меѓу балканските музичари од Вардар (Драгор во
случајов) до Триглав. Бендот е составен од Јелена Русјан (Borghesia, TRUS!) –
вокал и бас, Македонецот Дамјан Маневски (Rush to Relax, Molokai) – вокал и
гитара и словенечкиот тапанар Јан Кмет (balans, Kalu). Иако постојат релативно
кратко време, брзо се врежаа во свеста на алтернативната јавност преку
возбудливиот инди-гитарски звук, придружен со машко-женски вокали на српски и
македонски јазик. Дебитантскиот албум, „Čuka bije pumpa“ (Moonlee Records, Ill
in
the Head Records, 2021) претставува ударно женско-машко повеќегласие на
различни јазици кое лесно се всадува во срцата на слушaтелите.
https://kanal103.us19.list-ma
SHOCK TROOPERS се скопско/кочанска комбинација формирана во 2007. Свират
метализиран crust / hardcore. Зад себе ги имаат албумите „Лешинари“ (CD 2014) и
„Глуво Доба“ (LP 2019), како и две европски турнеи и еден куп концерти низ
Македонија. Во состав: Иван Јованов, Кирил Манчевски, Виктор Андоновски,
Владимир Петковиќ, Драган Теодосиев.
https://kanal103.us19.list-ma
PERIJA е уникатно музичко доживување. Песни испеани на повеќе јазици,
отсвирени на инструменти од повеќе традиции (уд, тамбура, бендир и ќемане).
Музичката инспирација на оваа четворка (Катерина Димитровска, Леа Милиновиќ,
Деа Плевнеш, Огнен Златанов) е во балканските традиции под силно влијание на
музиката на Ориентот. Сепак, современиот, стилизиран израз ги прави уникатни во
нивната мисија да го реконструираат културното минато преку стари песни и
приказни за љубовта и страдањето.
https://kanal103.us19.list-ma
СВЕТЛОСТ се Кристијан Новковски, Дени Омерагиќ и Нинослав Спировски. СВЕТЛОСТ
се бескомпромисно слободен џез-панк. Како трио издаваат два албуми „Jazz (to
the working class)“ и „Six Years“ (обата 2020 за PMGJAZZ). Нивното дебитантско
остварување „Odron Ritual Orchestra“ снимено во проширен 11-член ансамбл е
сместено меѓу најдобрите за 2019 од страна на платформата Bandcamp (меѓу
другите).
https://kanal103.us19.list-ma
ТОДОР КАРАКОЛЕВ движи низ повеќе електронски жанрови, ама секогаш движи
опасно! Прави силно емотивна, но игрива музика, со секогаш луцидни текстови и
суптилен шарм. Поп за XXI век.
https://kanal103.us19.list-ma
BLAŽ е мултимедијален уметник од Изола, Словенија. Музика создава на
синтесајзери и ја нарекува strange-hop – по нашки: електроника + минималистички
инструментален хип-хоп. Од 2021 настапува со LELEE, и е гостин на нивниот прв
официјален сингл „Копнеж“.
https://kanal103.us19.list-ma
LUFTHANSA се новата надеж на автентичниот македонски рокенрол. Свират и пеат
Андреј Димовски, Раде Биковски, Виктор Стојановски, Лука Јованоски, Иво
Николовски и Мартин Џорлев. Нивниот настап е концертна промоција на касетата
„Demo Tape I“, лимитиран тираж во издание на Стотројка.
https://kanal103.us19.list-ma
ЗДЕНКО ПЕТРОВСКИ “Момент документ” – Сликовница со ликови и настани одржани во
Скопје 2007 – 2020 (МКЦ, 2021) Зденко Петровски е нашиот пријател од соседното
студио, своевиден ангел чувар на Стотројка. Зденко страсно и посветено ја живее
фотографијата и музиката. „Момент документ“ e импресивна фотографска
монографија за музичката сцена во Скопје во изминатите 15-тина години.
Почестени сме што е дел од нашата прослава.
