Млади музичари од цела Европа повторно креираат музика во ФАМЕС во Скопје

Концерти во Филхармонија, Сплит, Скопски Џез фестивал итн…

На 13 септември во Скопје, започнаа активностите на младите музичари од
различни европски земји, кои собрани заедно имаат единствена цел, а тоа е
музиката.

Во рамките на Европскиот окестарски изведувачки институт FAME’S,  кој
воедно претставува центар за обука на млади талентирани класични музичари
од Европа, започна вториот семинар наменет за овие млади луѓе. Се обидуваме
да им дадеме простор на младите музичари кои сакаат да ја искористат
можноста да се обучуваат и да се професионализираат во делот на
оркестарското свирење и практики, да се запознаат со различни стилови во
областа на симфониското музицирање, филмската и медиумската индустрија.

Овој проект е ко-основан од Креативна Европа со поддршка на Европската
Комисија, како дел од проектот Паневропски културни ентитети 2021-2027
година .

Проектот повторно ќе се одвива во студиото FAME ‘S во Скопје, место на
средби на меѓународни уметнички експерти и талентирани млади класични
музичари од земјите учеснички во програмата Креативна Европа, како и млади
музичари од Македонија.

Семинарот кој веќе започна ќе трае до 22 октомври. Во рамките и на овој
втор семинар, учесниците ќе имаат можност да работат со врвни диригенти,
ментори и уметници, а македонската публика ќе има можност да го слушне
оркестарот веќе на концертот на 18 септември кој ќе се одржи во салата на
македонската филхармонија, со почеток во 20 часот.

Овој концерт ќе биде под диригентската палка на маестро Бенџамин Шварц а на
програмата ќе биде изведена нај популарната Бетовенова симфонија, бр. 5 и
прекрасните Романски танци од Барток.

Влезот за концертот е слободен, со цел што поголем број на публика да може
да го запознае овој оркестар и она што тој го работи.

Секој мастер клас од семинарот има и концерт, па така по овој концерт,
оркестарот следната седмица патува во Сплит каде во соработка со Европската
асоцијација на композитори, ќе настапи на големиот настан по повод
доделување на награди а вториот концерт во Сплит, ќе биде со популарна
филмска музика. Овие концерти ќе бидат под раководство на Маестро Тимоти
Редмонд.

Во октомври, во соработка со Скопскиот Џез Фестивал, гудачкиот дел од
оркестарот ќе настапи на отворањето на годинешниот фестивал заедно со Роб
Мазурек.

Како завршница на овој семинар, ќе биде гостувањето на познатите Куареим
квартет и Наташа Роџерс.

ФАМЕ'С европскиот окрестарски изведувачки институт претставува
музички образовен центар кој што е создаден во рамките на компанијата
ФАМЕ'С која се занимава со професионално снимање и продукција на
музика. Организиран во Скопје, центарот претставува уникатна
платформа за професионална музичка едукација, размена на искуства и
креативност, наменет за млади талентирани инструменталисти од
Европа.
ФАМЕ'С институтот го започна европскиот оркестарски креативен
програм за талентирани млади музичари кои се обучуваат пред се во
полето на оркестарската музика, како дел од програмата за Пан-
Европски културни ентитети (CREA-CULT-2021-PECE). Програмата е
фокусирана на креирање можности за младите таленти и обезбедува
едукација во разновидни оркестарски практки, истражувајќи нови
стилови, збогатувајќи го репертоарот со нови композиции итн. Оваа
програма овозможува високо професионално ниво на обука, пракса,
менторирање и изведби, преку новите методологии и технологии кои се
овозможени во студиото на ФАМЕ'С.
Креирајќи професионална и оригинална оркестарска и музичка
содржина, преку различни дигитални платформи, проектот се стреми и
кон развој на нова публика, пренесувајќи ги искуствата и културниот
диверзитет на европското музичко наследство.
Овој институт во кој главен фокус има делувањето на оркестарот, во
текот на првиот семинар, составен од 6 мастер класови во полето на
класичната музика, филмската музика, професионално снимање на
музика, хибридна музика и Карт бланш, беше домаќин на повеќе од 60
млади музичари од различни земји од Европа (земји учеснички во
програмата Креативна Европа) како и врвни музички уметнции кои ги

раководеа активностите на овој семинар. Меѓу нив, ќе ги забележиме и
имињата на диригентот Тимоти Редмонд, Колсимча бенд, Оливие Труан,
Алистер Кинг, Луис Иварс, Франческо Тристано итн…
Оркестарот го започува и вториот семинар во кој ќе бидат опфатени
истите жанри, но со различни уметници и програми. Дел од овие
програми ќе бидат претставени и на македонската музичка сцена но и на
сцените надвор од нашата држава.

Бенџамин Шварц е диригент, кој е високо ценет и од критиката и од
публиката токму поради неговата исклучителна музикалност и
интензитет во процесот на создавање на музиката, чистата музичка
мисла и визија, проткаени во неговите фантастични интерпретации.
Едноставно, тој е сензација! Така го оцени музичката критика. Овие
квалитети заедно со широкиот репертоар на дела произлегуваат од
неговиот континуиран порив за истражување и проширување на
индивидуалните звучни хоризонти.
Оваа сезона Шварц ќе работи како шеф-диригент на државниот оркестар
на Рајнската филхармонија. Од 2013 до 2016 година работел како
музички директор на Филхармонискиот оркестар на Вроцлав, Полска. Со
својата работа во овој оркестар тој беше вклучен и во голем број од
настаните што се реализираа во 2016 година, кога Вроцлав беше
Европска престолнина на културата. Работел и како гостин-диригент на
Филхармонијата на Дисбург (2019/2020), бил гостин-диригент на
Симфонискиот оркестар на Сан Франциско и музички директор на
Младинскиот оркестар во овој американски град.
Репертоарот на Шварц го рефлектира неговиот антидогматски, отворен
однос кон програмата и делата од различни епохи и стилови – од делата
на Џон Адамс до Малер, Брамс, Барток итн. Бил вклучен и во проектот
„Години на вознемиреност“, во соработка со скулпторот, сликар и
сценограф Александар Ползин, продукција која се базира на поезијата
на В. Х. Оден, во која преку музика и слики се прикажуваат настани од
раниот 20 век.
Како гостин-диригент, Шварц настапувал во Кралската филхармонија на
Стокхолм, Филхармонијата на Лос Анџелес, Кралскиот шкотски
симфониски оркестар, Симфонискиот оркестар на Токио, Националниот
оркестар на Лил и многу други. Работел и оперски продукции во
Шведската кралска опера, Операта во Келн, Вајнмар… Работел и
балетски продукции, меѓу кои и кореографијата на Пина Бауш на
„Посветување на пролетта“. Во неговата дискографија се делата од
Алберт Шнелцер кои ги сними со Симфонискиот оркестар на Готенбург,
делата на Поул Рудерс со Симфонискиот оркестар на Оденсе и музиката
на Васо Мендонца со оркестарот на Гулбенкиан.