Огнена Марија. Важен празник за жените. ВЕЧНО ИМЕ МАРИНА, МАРИЈА
Во словенската митологија, Огнена Марија е огнена божица која е сестра и помошничка на богот на громот, Перун. Огњена Марија потекнува како спој на ликовите на Маргарет и Дева Марија, и двете се сметаат за сестри на Свети Илија.
Православните верници на 30 јули го одбележуваат празникот на света великомаченичка Марина, во народот познат како Огнена Марија, која се почитува како борец за христијанската вера и заштитничка на жените.
Според народното верување, Света Марина пали и казнува со огин и како и Свети Илија кој казнува со гром, спаѓа во огнени светци.
Обичај е да на овој празник, кога поради големата жештина гори и небото и земјата, ништо да не се работи.
СветаВеликомаченица Марина, меѓу православниот народ позната уште и под името ОГНЕНА МАРИЈА, родена е во Антиохија Писисдиска. Потекнува од незнабожечки родители и како таква света Марина немала можност да биде воспитувана во вистинската вера, уште од својата рана младост. За Вистинскиот, Семоќени Животворен Бог и Неговиот Еднороден Син, Господ Исус Христос, нашиот Бог и Спасител, слушнала дури во својата дванаесетта година. Таа дознала дека по волја на Бога Отецот, Синот Господ Исус Христос, слегол од небото на земјата , дека се овоплотил од Пречиста Дева Марија и дека за време на Неговиот живот на земјата, извршил многу чуда и тоа такви чуда, какви што никој друг не направил, дека на крајот примил смртна казна, Распнат на Крст и дека по три дена, славно Воскресна и се вознел на небото. Кога го слушнала сето тоа , во нејзиното младо и чисто срце се распламтила голема љубов кон Господа, така што таа се заветила дека нема никогаш да се мажи и сета своја душа и со сето свое срце, сакала да му служи на Господа и да пострада за Христа и да ја удостои да се крсти со крв на мачеништво.
Но, поради таквата нејзина вера и љубов кон Божјиот Син, Господ Исус Христос, нејзиниот татко незнабожец, ја замразил и не ја сметал повеќе за своја ќерка. Кога почнало гонењето на Христијаните, тамошниот царски намесник Олимвриј, дознал за младата Марина дека е христијанка и веднаш побарал да му ја доведат кај него. Кога света Марина била доведена как намесникот Олимвриј, кој ја видел нејзината млада девствена убавина, веднаш побарал од неа ( Света Марина), да се омажи за него и да му биде жена. Но Света Марина ( Огнена Марија), го одбила, бидејќи се заветила дека нема никогаш да се мажи и со сета своја душа и сето свое срце, сакала да му служи на Господа. Тогаш и наредил да им се поклони на идолите (мртвите фигури-богови), на што света Марина му одговорила:”Нема да им се поклонам, ниту ќе им пренесам жртва на безживотните и мртви идоли, кои ниту самите знаат за себе, ниту пак знаат дали ние ги чествуваме или ги бесчестиме, не им ја давам онаа чест, што Му припаѓа само на мојот Создател”. Кога го слушнал одговорот на храбрат Христова девица Марина, Олимвриј разгневен ја положил на маки, па целата изнаранета ја фрлил во затвор. Во затворот света Марина се молеше на Бог и по мопитвата, најпрвин и се јавил Сотоната (ѓаволот) во вид на страшна змија, што и се замотала и ја стекнала околу главата. Но тука Господ Бог, направил чудо, на тој начин што кога светителката Марина (Огнена Марија) се ПРЕКРСТИЛА, змијата, всушност ѓаволот кој влегол во змијата за да ја исплаши и да се откажи од Вистинскиот и на Крст Распнат Господ, се распаднал и исчезнал.
И веднаш светата великомаченица Марина ја заблеснала небесна светлина и ѕидовите заедно со покривот на затворот исчезнале, се јавил Крст, висок, блескав, а на врвот на крстот стоела бела гулабица од која се слушмал глас:”Радувај се Марино, словесна гулабица Христова, ќерко на севишниот Сион, зошто дојде денот на твојата радост.” Веднаш потоа света Марина со силата Божја била исцеление од сите маченички рани.
Другиот ден, безумниот судија мачител, кога видел дека маченицата за која мислел дека можеби веќе е умрена од големите и смртоносни болки и маки, како стои потполно исцелена и здрава, ја положил света Марина (Огнена Марија) на уште поголемо и пострашно мачење. Ја фрлиле жива во оган и вода, но со помошта Божја, сите тие мачења ги трпела како да се во туѓо тело а не во нејзиното, таа не ги чувствувала. Најпосле кога мачителот видел дека не може со мачење ништо да постигне, ја осудил на смрт со меч. Пред самата смрт на светата великомаченица Марина (Огнена Марија) и се јавил Господ Исус Христос со ангели.
Светата великомаченица Марина (Огнена Марија) страдаше за Христа и беше заклана со меч во времето на многубожечкиот Римски император и голем гонител на Христовата Жива Црква-христијаните, Диоклецијан, но со душата и телото таа останала да живее и на небото и на земјата. Една рака од нејзините свети мошти се наоѓа на Света Гора, во манастирот Ватопед.
На планината Ланга во Албанија, во близина на Охридското езеро, се наоѓа манастир, посветен на света великомаченица Марина (Огнена Марија). Во манастирот се чуваат и дел од нејзините чудотворни мошти. Во манастирот се случувале и случуваат и во денешно време многубројни чуда. За чудата што се случуваат од чудотворни те мошти на света великомаченица Марина, сведочат не само христијаните, туку и муслиманите. Кон света великомаченица Марина, Турците имаат толку голема почит, така што никогаш не посакале да посегнат по светоста и имотот на манастирот, дури едно време тутор на манастирот бил Турчин.
Во нашата родна татковина Македонија, света великомаченица Марина (Огнена Марија), православниот Македонски народ ја слави и чувствува на 30ти Јулиано нов стил, а на 17ти Јули по стар стил на православниот календар.
На сите верници кои го носат името на света великомаченица Марина, молитвено им го честитаме Именденот, со желба, по молитвите на света великомаченица Марина, Господ да им дарува здравје, радост, мир и благосостојба во нивните домови.
