Ковачевски: Партнерски создаваме услови за нови инвестиции и работни места во време на светска криза
Премиерот Димитар Ковачевски присуствуваше и се обрати на настан во организација на Делегацијата на германското стопанство во Северна Македонија и Македонско-Германското стопанско здружение на тема: „Очекувањата на приватниот сектор од новата Влада во време на корона и енергетска криза“.
На настанот присуствуваа министрите за финансии Фатмир Бесими и за економија Крешник Бектеши, како и директорот на Дирекцијата за технолошки индустриски развојни зони Јован Деспотовски.
Во присуство на над 90 претставници на германски, македонски и други интернационални компании-членки на здружението, премиерот Ковачевски во своето обраќање ја истакна важноста од соработката и партнерството со деловната заедница за создавање подобар деловен амбиент, за нови инвестиции, за нови работни места и во услови на светска криза. Премиерот Ковачевски рече дека на економски план Владата има три приоритети, справување со последиците од светската енергетска криза, економски развој како и реализација на капиталните инвестиции.
„Странските инвестиции се важни за економскиот развој на нашата земја, а германските инвестиции, како и европските се клучни. Пандемијата ги покажа слабостите и видовме дека Европа се соочи со големи предизвици кога ланците на снабдување се во далечни земји. Во Европа може да се произведуваат многу работи, а тоа значи и заштеда на трошоците. Северна Македонија тоа ќе го искористи и затоа правиме амбиент за нови инвестиции. Ние сме членка на НАТО, нашата позиција е и членство во Европската Унија, за инвеститорите да знаат дека имаат сигурност и предвидлив деловен амбиент, впрочем тоа е нашата предност и во однос на некои од земјите од регионот“, изјави Ковачевски и додаде дека Владата во партнерство со сите релевантни чинители за да се спречи ценовниот шок предизвикан од светската енергетска криза, брзо и навремено, донесе пакет од 26 мерки во вредност од 400 милиони евра за да се амортизираат притисоците врз стандардот на граѓаните и да се обезбеди ликвидност на компаниите.
Ковачевски во своето обраќање посочи и дека продолжува трендот на раст на просечната нето плата, на минималната плата која е зголемена на 18.000 денари, регистрирани се трендови на намалување на невработеноста, а исто така подвлече дека за стопанството од особена важност е реализацијата на капиталните инвестиции, која е одлична дури и во време на криза. Премиерот истакна дека минатата година реализиравме 79% од капиталните инвестиции и со истото темпо се продолжува и оваа година.
Патрик Мартенс, директор на Делегацијата на германското стопанство во Македонија во своето воведно обраќање им посака добредојде на присутните и ја истакна важноста од традиционално добрата економска соработка меѓу двете земји.
„По кризата која ја предизвика пандемијата во стопанството во цела Европа, можам со голема радост да кажам дека во 2021 постигнавме рекордната трговска размена помеѓу двете земји, со вредност од 4,7 милијарди евра, што означува зголемување за 23,6 отсто во споредба со 2020. Мината година имаше и проширувања на инвестициите кај повеќе германски инвеститори во земјата од автомобилската индустрија. Но среќен сум дека има и нови инвестиции кои ќе отворат голем број на добро платени работни места во сферата на услужната дејност и грижата за клиенти“. Мартенс соопшти дека Македонско-Германското стопанско здружение иако измината година направи значајни промени во условите за членство и понатаму останува најголемо билатерално стопанско здружение во земјата, со 143 компании-членки.
Тој даде свој осврт и за темите кои ќе бидат клучни за Германија оваа година, како Зелена агенда и новиот Закон за добавувачи, кон кои ќе треба да се прилагоди и Северна Македонија, доколку сака да остане конкурентна како пазар.
Пред присутните се обрати и германската амбасадорка во земјата, Анке Холштајн.
„Доверливата клима на соработка со македонската Влада е важно признание за квалитет за локацијата Северна Македонија. Заедно ќе продолжиме да ја негуваме – за успешно да работат тие што се веќе овде, како и за понатаму да ја рекламираат Северна Македонија како добра дестинација за инвестиции“, изјави амбасадорката Холштајн.
Емилија Спировска, член на Управен Одбор на единствената германска банка во земјата, ПроКредит Банка говореше за предизвиците со кои се соочува бизнис секторот во времето на најголемата енергетска криза.
На настанот компаниите ја искористија средбата за вмрежување и имаа можност да дискутираат со претседателот на Владата и ресорните министри да споделат свои предлози и идеи кои може да допринесат за економскиот развој.
