Музички средби во СОКОМ – МАКЕДОНСКОТО МУЗИЧКО ТВОРЕШТВО, СЕГАШНОСТ И МИНАТО

Со интенција да го развие и продолжи одржувањето на „Музичките средби во СОКОМ
“, кои за прв пат со одржаа во 2019 година, и оваа година, Сојузот на
композиторите на Македонија организира научни средби кои се одржуваат под
темата „Македонското музичко творештво – сегашност и минато“.

Организирањето на „Музичките средби во СОКОМ“ е со цел да се поттикне и
унапреди научно–истражувачката дејност во областа на музикологијата,
етномузикологијата, музичката византологија, танцовата уметност, музичката
педагогија, музичкото културно наследство, музиката и поезијата, музиката и
медиумите. Освен претставување на научни истражувања, оваа година остваруваме и
професионални разговори со определен повод (награда, јубилеј, значајно
остварување надвор од нашите граници, ново дело, итн.) со музичките дејци за
определени теми или дела од
нивното творештво и дејност од областа на македонската музичка култура.

Координатор на настанот е музикологот д-р Мирјана Павловска Шулајковска, а
претседавач е Академик проф. д-р Јане Коџабашија. Со свои излагања и разговори
со истакнати музички дејци ќе се претстават македонски музиколози,
етномузиколози, педагози, истражувачи, меѓу кои: д-р Огненка Герасимовска
Димитровска, м-р Весна Малјановска, Академик проф. д-р Јане Коџабашија, м-р
Снежана Анастасова Чадиковска, проф. д-р Александар Трајковски, д-р Мирјана
Павловска Шулајковска, м-р Даница Стојанова, д-р Беким Рамадани и м-р Ивона
Опетческа – Татарчевска.

Настанот ќе се одржи во петок, 25 март, во Музејот на македонската борба со
почеток во 10 часот.