Македонски претставник на Европското слем првенство во Брисел

Македонскиот слемер Никола Дукоски ја претставуваше Македонија на Европското слем првенство во Брисел, Белгија на 8., 9. и 10. декември. Дукоски се натпреваруваше заедно со 19 други национални репрезентатвци и репрезентативки од вкупно 20 евроски земји. Овогодинешната земја-победничка е Белгија, а победата ѝ ја донесе претставничката Мари Дара. Тридневниот фестивал понуди различни програми кои можеше да се следат со физичко присуство и онлаин: дебати, форуми, работилници и, секако, натпреварувачкото слем финале. Жирирањето на финалето беше комбинирано: со избор од петчлено жири од публиката, избор од национално жири од секоја земја-учесничка и глобално оналин гласање. Македонското национално жири беше Валерија Дамчевска, која го освои третото место на националниот избор во Прилеп оваа година. „Европското слем првенство сè уште трае во сите изведувач(к)и кои во ниту еден момент не се почувствуваме како натпреварувач(к)и. Трае затоа што се поврзавме со разговори, уметност, поезија, музика, духовност и, пред сè, човечност. Организацијата беше одлична а слем перформансите се случуваа и зад сцената каде сите уживавме“. – Никола Дукоски „Ова ми беше прв пат јас да оценувам, а не да бидам оценувана, откако „запливав“ во водите на слем поезијата. Ми претставуваше огромна чест што лично јас бев избрана да ја претставувам нашата држава на ваков голем настан. Иако го следев првенството онлајн и се вклучив онлајн, целиот процес, за мене претставуваше голема одговорност, но пред сè предизвик да се дадат оцени на најдобрите во Европа. Само на ваков голем настан може да видите толку многу различни изведби, секоја уникатна и пренесена на свој начин, со моќни пораки кои остануваат врежани во увото на слушател(к)ите. Слемот е најдобриот начин да се (рас)каже некаква приказна или ситуација, оставајќи силен впечаток со пренесувањето. Сепак на крајот на краиштата, нашиот Никола е најдобар според мене и се претстави и нè претстави во најдобро светло пред европската публика. Сметам дека нашата земја сè уште се запознава со слем поезијата и огромен дел од луѓето сè уште не знаат што воопшто претставува слемот, иако ние слемер(к)ите, интензивно работиме што поголем број на сограѓан(к)и да се запознаат и вклучат во ваквиот тип на поезија и перформанс“.