Концерт на дувачкиот квинтет на Ансамблот КонТемпора со гостин пијанист

Програма:
 

Вулнет Таири
ЧЕТИРИ ПИЕСИ

Георгиа Калодики
ЧЕТИРИ СКИЦИ ЗА ПИЈАНО

Марин Големинов
КВИНТЕТ

Георгиа Калодики
SLIPPERY

Стојан Стојков
M.C.A.

Валентина Велковска Трајановска
ЦРНО СОНЦЕ

Љубомир Бранѓолица
ДУВАЧКИ КВАРТЕТ НА РЕВОЛУЦИОНЕРНИ ПЕСНИ

Георгиа Каладики
STIGMI
 

Во четврток (15 октомври), во Музејот на македонската борба со почеток во 20 часот концерт ќе одржи Дувачкиот квинтет на Ансамблот за современа музика „КонТемпора“ со гостинката Огненка Герасимовска Димитровска на пијано. Дувачкиот квартет на Ансамблот „КонТемпора“ ќе настапи во состав: Златка Митева – флејта, Владимир Лазаревски – обоа, Игор Иванов – кларинет, Горан Јанев – хорна и Марјан Милошевски – фагот. На програмата се камерни дела од македонските автори Љубомир Бранѓолица, Стојан Стојков, Валентина Велковска Трајановска Трајановска и Вулнет Таири, од бугарскиот композитор Марин Големинов, а посебен акцент во програмата е ставен на грчката композиторка Георгиа Калодики, од чиешто творештво квинтетот ќе изведе три композиции.

Концертoт е дел од проектот на СОКОМ насловен „Европски и балкански музички мисли“. Културното наследство на Европа е еден богат и разнолик мозаик од културни и креативни изрази, наследство од претходните генерации Европејци и оставнина за тие што доаѓаат. Идејата зад проектот „Европски и балкански современи музички мисли“ е да се придонесе кон развојот на нови професионални вештини кај домашните културни дејци, поддржувајќи ги културните и креативните индустрии во чиишто рамки тие делуваат и изнаоѓајќи нови модели за презентација на уметничкото творештво и меѓународна соработка.

Проектот се спроведува со поддршка на Делегацијата на Европската Унија во Скопје, Сојузот на композиторите – СОКОМ, Град Скопје и Министерството за култура.
 

---

Грчката композиторка Георгиа Калодики завршува магистерски и докторски студии по акустична композиции на колеџот Голдсмитс при Универзитетот во Лондон во класата на композиторот Роџер Редгејт. Студирала композиција со Јанис Јоанидис, Јосиф Пападатос и Александрос Калогерас, музика за кино и мешани медиуми со Александрос Музас, како и класична гитара со Елена Папандреу. Нејзиното композиторско творештво опфаѓа соло, камерни оркестарски дела, електронска музика и музика за филм и мешани медиуми. Нејзините интереси се фокусирани на интерактивниот однос помеѓу формата и материјалот во современата музика, поле во кое таа неуморно експериментира со широкиот опсег на можности што произлегуваат од интеракцијата на овие два елементи. Во моментов Георгиа е кандидат по докторски студии на Универзитетот Јонио во Крф, на одделот за електроакустична композиција. Нејзините дела се изведени и наградени со признанија во Грција и странство (Гете Институтот, Athens Music Hall, Конзерваториумот Јаначек во Чешка, Old Operating Theatre of London, Центарот за перформанс ТСАИ при Универзитетот во Бостон, Alte Shmeide во Виена), од страна на признаени ансамбли како Кројцер квартет, Kamareta Orchestra од Грција, Грчкиот ансамбл за модерна музика, АЛЕА, Red Note Ensemble и други. Нејзини композиции се нарачани од страна на Универзитетот во Бостон, Универзитот Кападострија од Атина, Orchestra of Colours, Acanthes, Атинскиот младински оркестар АСОН, Red Noise Ensemble, Dissonart Ensemble и многу други. Нејзините дела се објавени од страна на Subway Records. Авторка е на музиката за четири неми филмови во продукција на Фонадцијата „Какоџани“ за изданијата на Грчкиот фестивал на нем филм во периодот од 2010 – 2012. Калодики е авторка и на музиката за неколку театарски продукции со Рула Патераки, Еугелија Таласини и Хлија Еугалиди. Членка е на Здружението на грчки композитори, ESSIM и колумнистка за грчкото музичко списание „Политон“.
 

---