ЕДУКАТИВЕН ЧАС ВО ЈП ЛАЈКА

Во месецот посветен на животните продолжуваме со едукативни посети во ЈП
Лајка со нашите најдраги гостинчиња од проектната единица за згрижување
и воспитание на деца од предучилишна возраст – детска градинка на
министерството за финансии „Мини Фини Буџетчиња”.
Инвестирањето во едукација на најмладите и развивање на хуман однос кон
животните се едни од нашите приоритети. Новите генерации треба да учат
за одговорно сопствеништво и да ја развиваат културата за вдомување
бездомни животни на што макотрпно работевме изминатава година.
Нашите гостинчиња имаа можност да се запознаат со работата на
претпријатието, да се дружат со кучињата, да ги хранат и чешлаат и да им
помогнат на нивните негователи. Ја посетија и ветеринарната служба каде
докторот по ветеринарна медицина им одржа едукативен час.
Благодарност до воспитувачките и родителите на сите овие прекрасни
дечиња кои беа иницијатори за оваа прекрасна посета.

—
ЈП Лајка Скопје