Република Кипар со финансиска поддршка за филмот СНЕЖАНА НА КРАЈОТ УМИРА по сценарио и режија на Кристијан Ристески

Филмот СНЕЖАНА НА КРАЈОТ УМИРА, по сценарио и режија на Кристијан Ристески  доби финансиска поддршка од Република Кипар. Поддршката изнесува 44.000 Евра и е  обезбедена преку копродуцентот Константинос Никифору (Карета Филмс).  

Покрај соработката со композиторот Ставрос Макрис, со средствата ќе се покријат  и тонската финализација и колор корекцијата на филмот. Ова е прва филмска  копродукција помеѓу Македонија и Кипар и воопшто – прва културна соработка помеѓу  овие две земји. 

Иницирањето соработка со држава со која досега не сме копродуцирале е голем  успех за македонската, но и за кипарската кинематографија. Малите кинематографии,  како нашите, многу зависат од реципроцитетот во финансирањето и се надевам дека  оваа соработка ќе им отвори врата на многу македонски и кипарски продуценти и  автори при реализацијата на нивните идни проекти.  

СНЕЖАНА НА КРАЈОТ УМИРА е дебитантски филм на Кристијан Ристески, чии  најблиски соработници беа Димо Попов и Севдије Кастрати како кинематографери,  Емилија Ивановска Атанасовска како костимограф, Сашо Блажевски како сценограф,  Мојца Горогранц Петрушевска како маскер/шминкер, Горан Вуќиќ како монтажер и  Александар Пејовски како композитор.  

Главните улоги ги толкуваат Верица Недеска, Тино Костадиновски, Сашко Коцев,  Ивица Димитријевиќ, Дениз Абдула, Давид Јанакиев и Наташа Петровиќ.  

Филмот е во продукција на Вертиго Висуал, а продуценти се Дарко Попов и Јовица  Пановски. Сценариото е развивано на Мидпоинт Македонија и на престижната  работилница за сценарио Sources 2, а во развојната фаза проектот беше успешно  презентиран на Cinelink во склоп на ИФФ Сараево и на Balkan Film Market во Тирана.  Премиерата ќе биде во текот на 2022 година.  

Во прилог е и официјалното известување од Министерството за образование,  култура, спорт и млади на Република Кипар