Трет Регионален форум на политики за рурален развој
Преку 40 претставници на граѓанскиот сектор од земјите на Западен Балкан
учествуваа на денешниот трет Регионален форум на политики за рурален
развој, организиран во Охрид, од страна на *Балканската мрежа за рурален
развој.*
Форумот кој има за цел да го подобри дијалогот помеѓу сите релевантни
чинители во областа на руралниот развој, оваа година опфати теми
исклучително важни за руралните заедници во регионот како: родовата
еднаквост и интеграцијата на родовата перспектива во националните и
регионалните политики за рурален развој; Социјалното претприемништво и
учеството на младите од руралните средини во процесите за рурален развој.
„Заедничка обврска и приоритет на Министерството за труд и социјална
политика и Владата на Република Северна Македонија е унапредувањето на
родовата еднаквост. Таа е и дел од Програмата за работа на Владата
2020-2023 како и обврска од Агендата за одржлив развој до 2030 година
како на национално така и на локално ниво.
Како Влада се заложивме за градење на општество со еднакви можности на
жените и мажите. А во остварувањето на овој концепт важна улога имаат и
жените кои живеат во руралните средини бидејќи тие се особено исправени
пред бројни предизвици.
Како министерство сериозно го движиме и процесот на децентрализацијата.
Овој процес е од особено значење , затоа што овозможува меѓуопштинска
соработка за комбинирање на локални капацитети и ресурси односно соработка
на регионално ниво која е од големо значење ако земеме во предвид дека дел
од општините во Република Северна Македонија, особено помалите, се
соочуваат со недостаток на сопствени, локални капацитети и ресурси..“* –
изјави Г-ѓа Јагода Шахпаска, Министерка за труд и социјална политика*.
„Родовата еднаквост мора да се земе предвид кога се донесуваат одлуки, се
распределуваат ресурси и се креираат и спроведуваат политики и законски
рамки. We Effect се обидува да биде двигател во придвижувањето на родовата
еднаквост на врвот на агендата за регионален рурален развој. Заедно со
нашите партнерски организации во регионот имаме посветен однос кон
соработката со цел донесување на позитивни промени“. – истакна *г-ѓа Анели
Леина, регионален директор на **We Effect **за Европа.*
„Потребно е зближување на луѓето од руралните области да работат на
заеднички потреби. Од друга страна, владата треба да ги приближи своите
институции до руралното население и да го користи креирањето на политики
како алатка за развој, без непотребни бирократски пречки. Би сакал уште
еднаш да ја истакнам важноста на граѓанските организации како медијатор во
овој процес, без чие учество тоа не би било можно.
Живеењето во рурална област не значи дека треба да чувствуваме дека сме зад
сите други и далеку од она што луѓето го нарекуваат добар живот. Луѓето кои
живеат во рурални области во Европа ги делат истите проблеми и предизвици и
се обидуваат да ги решат на ист начин. Сметам дека тоа е уште еден мотив да
не охрабри повеќе да се движиме во таа насока.“ -истакна во своето
обраќање, *г. Петар Ѓоргиевски, претседател на Мрежата за рурален развој на
Северна Македонија.*
Меѓу останатите говорници беше и *Г -дин Гоце Георгиевски, раководител на
секторот за рурален развој при Министерство за земјоделство, шумарство и
водостопанство, *кој зборуваше за начинот на вклучување на родовата
перспектива во политиките за земјоделство и рурален развој, притоа
спомнувајќи ја како пример мерката 115 за финасиска поддршка на жени
земјоделки, чија цел е да се подобри економската положба на жените.
Ова е трет регионален форум организиран од страна на Балканската мрежа за
рурален развој, а е финансиски поддржан од шведската развојна организација
We Effect. Со цел да се подобри дијалогот помеѓу граѓанското општество и
носителите на одлуки, во процесот на креирање на политики за рурален
развој, Форумот ги обединува сите важни чинители во секоторот за
земјоделство и рурален развој од Западен Балкан, за да разговараат за
предизвиците и активностите што ќе придонесе за подобрување на условите за
живот и благосостојба на руралните заедници.
