Младиот композитор Филип Иванов го доби признанието за најдобро музичко дело на конкурсот по повод 100-годишнината од раѓањето на Блаже Конески

Во рамките на конкурсот во чест на 100-годишнината од раѓањето на Блаже Конески кој го организира Агенцијата за млади и спорт со цел да ги награди младите поети, музички и ликовни уметници, композиторот Филип Иванов го освои признанието за најдобро музичко дело во областа на класичната музика, за соло песна за глас и пијано напишана на текст од Блаже Конески.
 
„Да се организираат конкурси од овој вид со кои би се стимулирале уметниците да творат и да придонесуваат за развојот на материјалната и духовната културата во нашата земја, е од огромно значење бидејќи уметностa игра голема улога и е дел од создавањето и развојот на секое современо општество. Наградениот труд на уметникот секогаш претставува големо задоволство и стимул за понатамошно творење. Искрено се надевам дека во иднина ќе продолжат да се распишуваат конкурси од институциите со кои би сe стимулирале уметниците кои долго време се на маргините во оваа држава.“ – изјави младиот уметник по повод добивањето на наградата.
 
Филип Иванов (1992) припаѓа на најмладата генерација македонски композитори. За време на студиите и особено по дипломирањето на ФМУ во Скопје (класа проф. Сони Петровски) активно е присутен на македонската музичка сцена, а повеќе негови композиции досега биле изведени и на музичките подиуми во странство. Повеќе негови дела се наградени на конкурсите распишани од страна на Министерството за култура. Во досегашната композиторска кариера на Филип Иванов особено се истакнува изведбата на Концертот за виолина и оркестар, од страна на виолинистот Александар Иванов и Македонската филхармонија под диригентско водство на маестро Борјан Цанев на Свеченото отворање на фестивалот „Денови на македонска музика“ во 2018 година. Од 2017 година Филип Иванов е редовен член на Сојузот на композиторите на Македонија – СОКОМ.