Музичко патување со македонски солисти

„Музичко патување“ е насловен концертот кој ќе се одржи в петок во 20 часот.
На програмата за Концертот за кларинет и виола оп.88 од Брух и Симфонијата
бр.4 –„Италијанска“ од Менделсон. Солисти се Здравко Ангелов (кларинет) и
Илза Бафтиари (виола), а диригент е маестро Конрад ван Алфен од Холандија.

Макс Брух (1838 – 1920) е познат по неговите опери, три симфонии, три
виолински концерти, како и хорска музика. Неговиот музички јазик е
инспириран од германската романтична традиција и е сосема спротивен на т.н.
нова музика која ја создаваа Лист, Вагнер и Малер. До крајот на својата
музичка кариера Брух го „бранел“ својот романтичен концепт и водел
контроверзни дискусии со композитори како што се Вангер и Лист, а посебно
жестоки расправии имал со Штраус, кој ја забранил неговата музика во
Германија во почетокот на 1940-тите години.

Концертот за виола и кларинет го напишал за својот син Макс Феликс Брух, кој
бил многу талентиран кларинетист. Има три става во кои се испреплетуваат
виртуозноста и експресивниот контекст на креирањето музика. Концертот е како
своевидна рапсодија обоена со слатка меланхолија и носталгија.

Менделсон живеел во време кога голем број филозофи сметале дека климата
влијае на човечкиот карактер, јазикот, културата. Затоа воопшто не зачудува
фактот што критичарите веднаш по премиерата„Италијанската симфонија“ ја
доживеале како „топла и јужњачка“.Во Симфонијата бр.4, Менделсон успеал да
креиера совршена симфониска драма инспирирана од пејзажите на Италија, од
нејзината култура и начинот на живеење. 

Македонскиот кларинетист Здравко Ангелов го започнува музичкото образование
на 7-годишна возраст.Дипломира на Факултетот за музичка уметност во Скопје
во 2000 година во класата на проф. Иван Кочаров, а магистрира во 2012 година
на истиот факултет во класата на проф. Стојан Димов.Повеќе од 15 години е
вработен како прв кларинетист на Македонската филхармонија, на што му
претходат педагошката работа во Државното музичко училиште во Скопје и
двегодишното искуство како соработник на Македонската опера и балет.Во текот
на својата досегашна музичка кариера се стекнал со бројни признанија во
Македонија и во странство, а во 2000 година ја освојува специјалната награда
Yamaha.Настапува како солист со симфониски оркестри во нашата држава и
надвор од неа и како камерен музичар, а воедно е постојан член на камерниот
ансамбл „Консонанс“.Учесник е на значајни фестивали во Македонија – „Скопско
лето“, „Охридско лето“, „Интерфест“ – Битола, „Штипско лето“, „Денови на
македонска музика“, во Србија – „Номус“, „Бемус“, а како член и истакнат
солист на Македонската филхармонија со оркестарот настапува во Црна Гора,
Словенија, Србија, Бугарија, Хрватска, Шпанија, Оман, САД итн.
Исклучителната музикалност и посветеност на Ангелов е препознаена од многу
светски имиња кои сведочат за прекрасната атмосфера која тој ја создава
музицирајќи. Настапува под палката на истакнати диригенти како што се Борјан
Цанев, Саша Николовски-Ѓумар, Густав Кун, Даниел Рајскин, Урош Лајовиц,
Јерухам Шаровски, Владимир Ашкенази, Јануш Пшибилски, Антон Нанут, Пол
Мејер, Емил Табаков и многу други.

Илза Бафтијари започнува да учи виолина од 9-годишна возраст во класата на
проф.Сихана Бадивуку. На 16-годишна возраст започна да изучува виола во
класата на проф.Јован Бицевски во ДМБУЦ „Илија Николовски-Луј“ во Скопје, а
додипломските музички студии ги изучува во класата на проф.Фросина Балова.
Има одржано бројни концерти и рецитали со својот брат Шкељзен Бафтијари,
пијанист. Настапува и во камерни состави, а два пати како солист со
Македонската филхармонија, потоа како солист со камерниот оркестар на ДМБУЦ
во Италија и камерниот оркестар „Солисти“ на ФМУ. Свирела во неколку
меѓународни оркестри како што се CEI Orchestra и Jugest Sinfonie Orchester
со настапи во Италија, Словенија, Австрија, Швајцарија, а веќе трета година
е дел од германскиот оркестар Manheimer Philharmoniker,каде што настапува во
најпрестижните сали во Европа како што се ElbPhilharmony во Хамбург и Queen
Elizabeth Hall во Антверп, како и со врвни солисти како што е Марта Аргерич.
Бафтијари работи и во оркестарот на Косовската филхармонија, а од 2020
година е редовно вработена во Македонската филхармонија. Член е и на
оркестарот на Музичка младина, а редовно снима филмска музика во оркестарот
„Фејмс“.

Конрад ван Алфен е инспиративен диригент кој ги прави нештата да се
случуваат, ќе напише критиката за холандскиот маестро. Етаблираниот
холандски/јужноафрикански диригент Конрад ван Алфен се стекнал со својата
популарност и кај оркестрите и кај публиката благодарение на посебниот начин
на кој тој ги води пробите и изведбите. Маестро Ван Алфен е уметнички
директор и шеф-диригент на Симфонискиот оркестар во Ротердам. Во изминатите
16 години го издигнал својот оркестар на ниво да биде интернационално
признат оркестар и да стане домаќин на концертни серии во Ротердам, Хаг и
Амстердам. Исто така, тој е гостин-диригент и со оркестрите на
добропознатите културни центри во Новосибирск и Санкт Петербург. Во
изминатите години, бројни оркестри низ светот настапиле под диригентската
палка на Ван Алфен, и тоа во: Холанија, Германија, Белгија, Италија,
Швајцарија, Англија, Данска, Израел, Словенија, Србија, Бугарија, Романија,
Полска, Јужна Африка, Кина и Мексико. Неодамна успешно дебитирал со
Филхармонискиот оркестар од Брисел, со „Симфоникер“ во Бохум и со
Симфонискиот оркестар „Светланов“ во Москва. Голем број солисти ја уживале
неговата придружба, како што се: Даниел Хоуп, Жанин Јансен, Бенџамин Шмид,
Куирин Виерсен, Роланд Браутигам, Албан Герхард, Симон Ламсма и Никита
Борисо-Глебски. Низ изминатите години, неговите соработки со Рускиот
национален оркестар и солистот Михаил Плетнеев на фестивалите во Монтро и
Мерано резултирале со неколку покани за соработка за турнеите во Кина и во
Јужна Америка.