ЕГЗИТ го претставува концертниот филм со Сатори на Голубачка тврдина
Откако првото издание на Егзитовиот проект „InfinitX“ (Инфинитикс), снимен на будванската тврдина Могрен, го погледнаа повеќе од три милиони луѓе ширум планетата, овој одличен проект ќе претстави пред светот и дел од убавината и богатата историја на Србија. „ЕГЗИТ“ и Делегацијата на ЕУ во Србија, во недела 9 мај, на Денот на Европа, ќе го претстават специјалниот концертен филм со настапот на исклучително ценетиот холандски уметник Сатори, кој е снимен на преубавата средновековна тврдина Голубачки град. Ова своевидно музичко патување ќе биде премиерно претставено на еден од највлијателните филмски фестивали на овие простори, белградскиот „ФЕСТ“, чие 49 издание се одржува од 7 до 14 мај. „InfinitX“ воедно е и најава на новиот албум на Сатори во продукција на „Егзит“, со кој на светот ќе му ја претстави балканската традиционална музика во модерен аранжман. „Сатори на тврдината Голубац: Звуци на минатото“ ќе може да се погледне во недела, 9 мај, најпрво во кино-салите во рамки на „ФЕСТ“ во 20:00, а веднаш потоа ќе започне и глобалниот пренос на официјалната „Фејсбук“ страница на „ЕГЗИТ“ Фестивалот во 20:21 часот, додека во 22:50 снимката ќе биде емитувана и на вториот канал на српската национална телевизија „РТС“.
Денот на Европа се одбележува секој 9 мај, како датум на основање на денешната Европска унија и ги промовира мирот и единството на континентот. „Верувам дека музиката ги поврзува луѓето, дека има моќ да биде над сите граници, култури и авторитети, и да ги обединува луѓето. Мислам дека не може да бидеме поблиску до мирот од таквото обединување, зарем не? За мене мирот претставува кога сме сите заедно и танцуваме. Тоа е ’Сатори моментот’“ порачува Сатори во филмот за време на неговиот разговор со основачот на „ЕГЗИТ“ фестивалот Душан Ковачевиќ.
Сатори неизмерно ја почитува балканската етно музика и таа инспирација од ова поднебје и тоа како ќе се почувствува во неговиот сет на Голубачката тврдина, каде имаше место и за специјалната гостинка од Србија, пејачката и актерка Милица Мајсторовиќ. Благодарение на фанстастичната атмосфера на сетот, инспирираните изведувачи и увежбаниот видео-тим, „Сатори на тврдината Голубац: Звуци на минатото“ влегува во самиот врв на локациските видеа кои се достапни на светската сцена. Овој начин на промоција на дестинациите и нивните културни богатства се покажа како исклучително успешен, бидејќи привлекува милионски број на гледачи ширум светот, до кои претходно беше невозможно да се дојде без мултимилионски договори со глобалните медиуми. Стримуваните диџејски сетови од атрактивните туристички локации дополнително станаа актуелни за време на пандемијата на коронавирусот, имајќи предвид дека младите кои ги следат овие содржини се воедно и меѓу првите кои им се враќаат на туристичките патувања.
Ова издание на „InfinitX“ со настапот на Сатори е снимен на монументалната Голубачка тврдина, сместена на брегот на Дунав и на самиот влез во Ѓердапската клисура, а која е неодамна реконструирана и отворена за посетители. Обновата траеше скоро пет години, со голема финансиска поддршка од ЕУ, која пак продолжува да ја поддржува реставрацијата на многу места од српското културно наследство, како што се тврдините Бач, Фетислам во Кладово и Пирот и го поттикнува развојот на локалниот туризам.
