76 години постоење средно медицинско училиште „Панче Караѓозов“
Средното училиште „Панче Караѓозов“ денеска одбележува 76 години постоење, како прво медицинско училиште во нашата земја. На патронатот, училиштето го посети градоначалникот Петре Шилегов кој нагласи дека Градот Скопје во изминатите три години интензивно вложува во обнова на градските средни училишта, за да се подобрат условите за работа и на учениците и на наставниот кадар.
- Денеска, на Денот на здравјето, се наоѓаме во средното медицинско градско училиште „Панче Караѓозов“ и симболично одбележуваме 90 години од постоењето на медицинската техничка струка во Македонија, но и 76 години од постоењето на средното медицинско училиште „Панче Караѓозов“. Во вакви услови на светска пандемија, барем ја сфативме суштината на човековото здравје, го сфативме здравјето како приоритет. Горд сум што Градот Скопје во изминативе три години овде, во ова средно училиште, има инвестирано вкупно 54 милиони денари – ги обновивме во целост подовите, вратите на училниците, надворешната столарија, целосно го уредивме новото спортско игралиште по сите стандарди, партерно го уредивме дворот и ЛЕД осветлувањето. Кога ќе се нормализира состојбата, очекувам во наредната учебна година повторно да ни се вратат учениците. Станува збор за околу 2.400 ученици кои се во 5 различни струки, распоредени во 76 паралелки, а кои ќе наидат на обновено училиште – рече денеска градоначалникот Шилегов.
Тој додаде дека неговиот императив како градоначалник е да се инвестира во образовната инфраструктура на Градот, за да се подобри квалитетот на учењето и на престојот на учениците.
- Пандемијата ќе помине, а учениците во скопските средни училишта ќе влезат во обновени простории – нагласи Шилегов.
На денешниот настан присуствуваше и директорката на СУГС „Панче Караѓозов“, Маја Салиу.
Значајно е да се нагласи дека во изминативе три години, градежни зафати за обнова на училишните згради се изведуваа во речиси сите градски средни училишта – дел од нив добија енергетски ефикасни фасади, а во дел се вршеше реконструкција на внатрешноста или на дворовите. Во сите 23 училишта, во секоја училница Градот Скопје постави вкупно 572 прочистувачи на воздухот.
Град Скопје
