Втората доза на кинеска вакцина по шест месеци е полн погодок: Ефикасност до 90 проценти

Кинеска компанија за вакцини, CanSino Biologics, објави дека ефективноста на нејзината вакцина против Ковид-19, која се дава во единечна доза, со текот на времето може да се намали, иако треба да има стапка од 50 проценти или повеќе, најмалку пет до шест месеци по имунизацијата.

„Втората доза дадена на учесниците во студијата шест месеци по нивната прва инјекција може да обезбеди значителна заштита, бидејќи го зголемува нивото на антитела за седум пати, а ефективноста на вакцината надминува 90 проценти“, изјави Џу Тао, главен научник на компанијата, во интернет презентацијата за која вчера објави Ројтерс, пишува Гардијан.

Компанијата во февруари објави привремени податоци, кои покажаа дека вакцината е 68,83 проценти ефикасна во спречувањето на симптомите на Ковид-19 две недели по вакцинацијата, но стапката паднала на 65,28 проценти по четири недели.

Гардијан објави дека оваа кинеска вакцина е одобрена во Кина, Пакистан, Унгарија и Мексико, а CanSino планира клиничко испитување во Кина за верзијата на вакцината што се администрира со вдишување.