Повлечени вакцини, цела серија не може да се користи

Серија вакцини против коронавирусот на компанијата Johnson & Johnson не ги исполнија стандардите за квалитет и не можат да се користат, објави денес фармацевтскиот гигант.

Компанијата не наведе колку дози на вакцини не можат да се користат и не е познато како тоа ќе влијае на идните испораки, пренесува АП.

Според изјавата, проблемот настанал бидејќи состојката на вакцината произведена од Emergent BioSolutions, една од 10-те компании со кои Johnson & Johnson соработува за забрзување на производството, не ги исполнувала стандардите за квалитет.

Се додава дека американската Администрација за храна и лекови сè уште не ја одобрила фабриката Emergent BioSolutions за производство на дел од вакцината.

Johnson & Johnson ветија дека ќе обезбедат 20 милиони дози вакцини на американската влада до крајот на март и уште 80 милиони дози до крајот на мај.

Компанијата во соопштението вели дека планира да ги испорача сите 100 милиони дози до крајот на јуни.