Германија бара негативен тест за пристигнување со авион

Германија ќе бара од сите патници кои пристигнуваат со авион од странство да имаат негативен тест за коронавирус, објави Министерството за здравство.

Патниците ќе мораат да покажат негативен резултат од тестот, не постар од 48 часа, пред да се качат во авионот.

Доколку одбијат да бидат тестирани, авиокомпаниите нема да ги превезуваат до Германија.

Новата регулатива ќе започне да се применува во недела и ќе трае до 12 мај.

Досега, потврда за негативен резултат од тестот беше потребна само од патници кои доаѓаат од регион што се смета за ризична област. Обврската за тестирање сега се однесува на сите патници на авиони од странство.

Ова не важи за патниците што влегуваат во Германија со автомобил или други превозни средства, за кои постојат различни регулативи, во зависност од стапката на инфекција во земјата од каде доаѓаат.