Извлечени паровите од ЛШ. Во четвртфиналето нè очекуваат два спектакуларни натпревари

Минатогодишните финалисти во Лигата на шампионите Баерн и Пари Сен Жермен ќе се сретнат во четвртфиналето на годинашното издание на елитното европско фудбалско клупско натпреварување, беше одлучено со ждрепка во седиштето на Европската фудбалска асоцијација во Нион.

Останатите двојки се Манчестер Сити – Борусија Дортмунд, Порто – Челзи и Реал Мадрид – Ливерпул.

Првите четвртфинални натпревари се закажани за 6 и 7 април, а реваншите на 13 и 14 април.

Победникот од мечот Баерн – ПСЖ во полуфиналето ќе игра против подобриот од натпреварот помеѓу Манчестер Сити и Борусија Дортмунд, додека во второто полуфинале победникот од мечот Реал Мадрид – Ливерпул ќе се бори против подобриот од двојката Порто – Челзи.

Првите полуфинални натпревари ќе се играат на 27 и 28 април, а реваншите се закажани за 4 и 5 мај.

Финалето во Лигата на шампионите ќе се одигра на 29-ти мај во Истанбул на Олимпискиот стадион „Ататурк“.