Вака звучи кога возите преку карпи на Марс: НАСА објави неверојатна снимка!

НАСА објави уште една снимка од роверот „Perseverance“, кој веќе еден месец е на мисија на Марс.

Станува збор за аудио запис од првото возење со роверот на Црвената планета, во кое се слушаат звуци кои според стандардите на Земјата се доста загрижувачки.

Бучавата произведена од металните тркала на роверот кој се движи преку површината на Марс на првото тест возење пред две недели е дел од 16-минутниот аудио запис кој го објави лабораторијата за реактивен погон на НАСА со коментар „Слушате ли? Вака звучи кога возите преку карпи на Марс. Ова е прва снимка од возење на Марс“.

– Ако ги слушнев овие звуци додека се возев со мојот автомобил, ќе застанев и ќе се јавев во влечна служба. Но, ако одвоите време и размислите за тоа што го слушате и каде е снимено, тоа има совршена смисла – изјави инженерот на тимот на НАСА Дејв Груел.

Ровер „Perseverance“ слета на Марс на 18 февруари, а неговата мисија е да бара траги од микробиолошки живот во областа на кратерот Езеро, бидејќи научниците сметаат дека на Црвената планета пред милиони години бил можен живот.