Повторното заразување со корона е ретко, но почесто кај постарите лица

Повеќето луѓе кои го преживеале коронавирусот се заштитени најмалку шест месеци од повторното добивање на инфекцијата, покажува неодамнешната студија, но за разлика од помладите, постарите луѓе имаат поголема веројатност повторно да се заразат.

 

Студија објавена од реномираното медицинско списание „Лансет“ открива дека само 0,65 проценти од луѓето по втор пат биле позитивни на тестот, откако претходно биле заразени за време на првиот и вториот бран на пандемијата во Данска. Ова е пониско за 3,27 проценти колку што биле позитивни на вирусот после употребата на многу попрецизните PCR-тестови, откако претходно биле негативни на брзиот тест.

 

Но, студијата покажа дека луѓето постари од 65 години имаат само 47 проценти заштита од повторување на инфекцијата, во споредба со 80 проценти заштита кај помладите луѓе.

 

Повторната инфекција е помалку веројатна кај помладите луѓе

 

“Нашата студија го потврди она што многу други го сугерираа. Повторна инфекција со ковид-19 е поретка кај помладите, здрави луѓе, а постарите имаат поголем ризик да ја добијат повторно”, изјави Стин Етелберг од данскиот Статенс Серум институтот.

 

Авторите на студијата не утврдија дека заштитата од повторна инфекција се намалува за време на шест месеци од болеста, но посочуваат дека се потребни дополнителни студии за да се утврди заштита од повторна инфекција кај различните варијанти на вирусот.

 

Податоците кои беа предмет на анализа беа собрани со помош на Данската национална стратегија за тестирање, во рамките на која минатата година беа тестирани 69 проценти од населението, или четири милиони луѓе. Коментирајќи ги резултатите, професорите од Царскиот колеџ во Лондон, Розмари Бојтон и Дени Алтман, изјавија дека резултатите покажуваат посиромашна заштита и се позагрижувачки од претходните истражувања.

 

„Овие податоци потврдуваат, ако воопшто има, дека можеби нема да можеме да ги исполниме очекувањата за стекнување на заштитен имунитет против SARS-CoV-2 преку природни инфекции и дека трајно решение е глобална вакцинација со високо ефикасни вакцини“, наведуваат авторите во написот, поврзан со ова истражување, објавено и во Лансет.