Лоша вест: Нетфликс нема да дозволува споделување лозинки

Сите знаеме како работи Нетфликс – дава можност повеќе претплатници да ја гледаат нивната содржина истовремено, што е предвидено за луѓе во исто домаќинство. Сепак, злоупотребата на оваа опција е толку голема, што компанијата сериозно размислува да го спречи споделувањето лозинки.

Секако, во Нетфликс се свесни дека луѓето често споделуваат една лозинка, со цел да ги намалат трошоците и да ја поделат претплатата. Пред пет години, еден од основачите, Рид Хастингс, изјави дека ова споделување на лозинки е „нешто со кое ќе мораат да живеат“, бидејќи е невозможно да се знае кој ја дели лозинката со децата, а кој со пријателите.

Аналитичката компанија Магид спроведе истражување, во кое е заклучено дека околу една третина од корисниците на Нетфликс ги споделуваат своите лозинки со други луѓе.

Се чини дека, во последно време, раководните лица на Нетфликс одлучија дека нема да го толерираат повеќе тоа, па некои корисници неодамна добија пораката дека „ако не живеат во истото домаќинството како сопственикот на претплатата, тие треба да имаат своја претплата”.

На некои претплатници им била испратена и СМС-порака со код што треба да го внесат доколку сакаат да продолжат да ги гледаат содржините на Нетфликс.