Вакцината на „Johnson & Johnson“ одобрена во ЕУ, се прима само во една доза
Европската агенција за лекови (ЕМА) денес условно препорача одобрување на вакцината против Ковид-19 од американската компанија Johnson & Johnson, која се дава во една доза. Таа е четврта одобрена вакцина во ЕУ, по вакцините на Фајзер, Модерна и АстраЗенека.
Европската комисија се очекува наскоро да даде зелено светло за пуштање на пазарот на оваа вакцина, а дистрибуцијата до земјите на ЕУ се очекува кон крајот на март или почетокот на април.
Европската комисија нарача 200 милиони дози од вакцината на Johnson & Johnson, со можност за набавка на дополнителни 200 милиони дози. Сто милиони дози треба да бидат доставени до јуни.
Сепак, Johnson & Johnson ја предупредија Европската унија пред два дена дека проблемите со снабдувањето можат да го комплицираат планот за испорака на 55 милиони дози вакцини во вториот квартал од годината.
Компанијата се обврза на испорака на 200 милиони дози од својата вакцина оваа година.
„Во согласност со нашиот договор, очекуваме да започнеме со испорака на 200 милиони дози на ЕУ во вториот квартал на 2021 година“, објавија од J&J, одбивајќи да коментираат за можните одложувања во испораката.
Секое ново одложување би бил дополнителен удар врз европскиот план за вакцинација, кој веќе беше отежнат од намалените пратки на производителите на вакцини и бавното воведување на вакцинација во многу членки на блокот.
Вакцината има една голема предност
За разлика од вакцините на Pfizer или Moderna, Johnson & Johnson може да се транспортира и чува во обичен фрижидер.
Исто така, вакцината на Johnson & Johnson има една голема предност – се дава само една доза, повторна вакцинација не е неопходна. На тој начин, многу побрзо и многу повеќе луѓе можат да бидат заштитени.
Глобалното клиничко испитување на вакцината кај 44.000 луѓе открило дека еден месец по вакцинирањето, таа била 66 проценти ефикасна во спречување на сериозно заболување од Ковид-19 и 100 проценти во спречување на хоспитализација и смрт.
Клиничките студии покажуваат дека вакцината е ефикасна и против бразилските и јужноафриканските видови на вирусот. Во Велика Британија, оваа вакцина сè уште не е користена, така што не се знае многу за нејзината ефикасност против британската варијанта на вирусот.
