Ефтин и добро познат лек штити од корона?

Аспиринот, еден од најстарите и најчесто користените лекови, може да спречи инфекции од коронавирусот, заклучија израелските научници.

Израелските научници откриле дека луѓето кои земаат мали дози на аспирин имаат 29 проценти помали шанси да бидат позитивни на ковид тестот, објавија израелските медиуми.

„Бевме навистина возбудени кога видовме големо намалување на бројот на позитивно тестирани лица и тоа дава охрабрувачко навестување дека аспиринот, толку добро познат и ефтин лек, може да биде корисен во борбата против пандемијата“, изјави Милана Франкел Моргенштерн од Универзитетот Бар Илан за израелските медиуми.

Покрај тоа, кај оние кои пијат аспирин вирусот трае пократко и помалку страдаат од инфекцијата.

Студијата се фокусирала на луѓе кои користат 75 милиграм аспирин за примарна превенција на кардиоваскуларни болести, но сè уште не страдаат од нив.

Професор Ели Маген, главниот автор на истражувањето, го опиша набљудувањето за можните корисни ефекти на ниските дози на аспирин врз ковид-19 како „прелиминарно, но ветувачко“.

Милана Франкел Моргенштерн изјави дека истражувањето е во рана фаза и дека се надева дека ќе доведе до понатамошни студии, потенцирајќи дека не препорачува луѓето на своја рака да земаат аспирин.