Вежбањето позитивно влијае на меморијата кај постарите луѓе

Ново истражување покажа дека вежбањето може да го промени начинот на комуникација на клучните делови на нашиот мозок како што старееме, подобрувајќи ги аспектите на размислување и меморија.

Истражувањето открива дека неповрзаните делови на центарот за меморија на мозокот почнуваат да комуницираат на покомплексен и поздрав нов начин по редовно вежбање, изострувајќи ги мемориските функции.

Според New York Times, овие откритија го прошируваат нашето разбирање за тоа како движењето го стимулира размислувањето и ја потенцираат важноста од вклучување во различни активности што ни овозможуваат да останеме во движење, без оглед на нашата возраст.

Идејата дека физичката активност го подобрува здравјето на мозокот е веќе позната. Експериментите кои вклучуваат животни и луѓе покажуваат дека вежбањето ги зголемува невроните во мозокот, што е неопходно за создавање и зачувување на меморијата, истовремено подобрувајќи ги вештините за размислување.

Кај постарите луѓе, редовната физичка активност го забавува вообичаеното губење на волуменот на мозокот, што може да помогне во спречување на губење на меморијата поврзана со возраста и да го намали ризикот од деменција.