Зошто треба да се ставите себеси на првото место: Не е себично, туку ЗДРАВО!

Секоја жена, без разлика дали е мајка, пријателка, сопруга или ќерка, треба да одвои дел од денот само за себе. Во еден агол каде што целосно ќе си се посвети себе си, на своите мисли, желби и обновување на енергијата.

На тој начин, тоа ќе и ја врати силата, ќе и го намали стресот, ќе и го подобри расположението. Покрај тоа, таа ќе биде подобра личност, и за себе и за другите.

Вашето здравје зависи од тоа

Стресот и недостатокот на сон го ослабуваат нашето тело, па затоа стануваме поподложни на разни здравствени проблеми. Многу луѓе знаат себеси толку многу да се оптеретат со обврски, што не успеваат да одвојат ниту половина час за одмор во денот, а уште помалку за хоби или некаква релаксација. И токму тоа остава последици врз физичкото и менталното здравје.

Работата може да почека

Имајте на ум дека работата никогаш не треба да биде приоритет или точка околу која се врти вашиот живот. Работните обврски треба да почекаат кога станува збор за важни работи.

Не ја одложувајте посетата на лекар заради работата и немојте да се убедувате дека ништо нема да ви се случи ако почекате некое време со некој преглед што планирате да го направите веќе подолго време.

Можеби ви се чини дека некоја задача што ја извршувате го бара вашиот максимум, па ја извршувате и во вашето слободно време, но верувајте тоа е погрешно.

Работата е работа, а слободното време треба да го користите за да одморите од работните обврски.

Квалитетна врска

Нема ништо лошо во грижата за потребите на вашиот партнер, но ако поради тоа ги занемарувате вашите потреби, тоа ќе има лошо влијание врз вашата врска.

Ако не научите јасно и гласно да ги искажувате своите сомнежи, емоции и желби, после некое време ќе се чувствувате запоставени.

Подобра пријателка и мајка

Ако мислите дека семејството и пријателите не ја забележуваат вашата нервоза, раздразливост или замор, се лажете! Тие и тоа како приметуваат кога се чувствувате лошо.

Не можеме секогаш да бидеме добро расположени, а падот на расположението и нервозата се доста чести. Меѓутоа, кога сме во состојба на хроничен стрес, тогаш сме склони кон прекумерни емоционални реакции, така што не ги гледаме работите како што навистина се.

Ова може да доведе до бројни недоразбирања, непотребни дискусии, па дури и кавги.

Затоа, внимавајте на себе и одвојувајте барем половина час секој ден за време на кој ќе ги релаксирате мислите, ќе вдишувате со полни бели дробови и ќе ги полните батериите за остатокот од денот. Запомнете, кога сте среќни, тогаш сте најкорисни за вашите најблиски.

Внатрешен мир

Не чувствувајте вина што ги ставате своите потреби пред потребите на другите. Имате целосно право вие да си бидете приоритет и постојано да се надградувате.

На овој начин, ќе станете подобра личност, свесна за своите интереси и потреби и ќе го најдете внатрешниот мир кон кој се стремиме сите.