Зошто март е „Месец на историјата на жените“?

Одбележувањето на правата на жените и оддавањето почит на понежниот пол во повеќето земји во светот е резервиран за еден ден во годината – Меѓународниот ден на жената, кој се слави на 8 март. Сепак, земји како што се САД и Велика Британија го прогласија целиот месец март за „Месец на историјата на жените“.

„Месецот на историјата на жените“ ги почитува и слави достигнувањата и придонесите на жените во современото општество. Овој месец ги обележува и борбите кои жените ги преживеале низ историјата, соочувајќи се со пречки во стекнување права и за себе и за низа други помалку застапени и обесправени групи.

Традицијата за еден месец одбележување на историјата на жените започна во Соединетите држави, кога Конгресот одобри и побара претседателот Роналд Реган да ја прогласи неделата што започнува на 7 март 1982 година, за „Недела на историјата на жените“.

Конгресот сметаше дека еден ден во годината не е доволен за обележување на придонесите на жените во општеството како целина. Во следните пет години, Конгресот продолжи да ја прогласува „Недела на историјата на жените“, а во 1987 година Националниот сојуз за историја на жените поднесе петиција до Конгресот за прогласување на март за „Месец на историјата на жените“, кој подоцна беше усвоен.

До денес, оваа традиција е усвоена од земји како Велика Британија, Австралија, Канада и Русија.

За одбележување на овој месец, на социјалните мрежи се подготвуваат разни тематски програми кои вклучуваат популарни креатори и уметници, како и познати личности кои ги инспирираат жените. Исто така, на Твитер и Фејсбук се многу популарни објавите со хаштагот #WomensHistoryMonth во кои се слават успесите на жените.